Berî hilbijartinan zexta Washingtonê li ser Bexdayê: Hikûmeteke bi milîsan dê neyê naskirin
PeyamaKurd – Rêveberiya Amerîkayê, beriya hilbijartinên parlamentoya Iraqê yên ku di 11ê Mijdarê de tên lidarxistin, hişyariyeke tund û rasterast da hêzên siyasî yên li Bexdayê. Li gorî agahiyan, Washingtonê ragihandiye ku heger di hikûmeta nû de posteke wezîrtiyê ji bo yek ji komên çekdar ên ku ji aliyê Îranê ve tên piştgirîkirin were veqetandin, ew ê wê hikûmetê bi fermî nas neke.
Li gorî çavkaniyekî ji Herêma Kurdistanê ku ji bo "Iran International"ê axiviye, ev peyama zelal di demekê de tê ku danûstandinên siyasî yên li ser pêkhatina kabîneya nû germ bûne. Heman çavkanî diyar kir ku her çend blokên Şîe û Kurd li ser mana posta serokkomariyê ji bo Kurdan li hev kiriye û Tehranê jî ev yek pejirandiye, lê hebûna postên din ên wezareta di destê van koman de ji bo Amerîkayê "xeta sor" e.
Guhertina hevsengiya hêzê
Çavkaniyê herwiha destnîşan kir ku berevajî hilbijartinên borî, tê gotin ku bandora Îranê vê carê li ser pêkhatina hevkêşeyên siyasî yên Iraqê lawaztir bûye. "Vê carê, Dewletên Yekbûyî yên Amerîkayê û welatên Ewropî ji bo şekildana encamê pir bi biryartir in," çavkaniyê got.
Di vê çarçoveyê de, têkiliya taybet a di navbera nûnerê Serokê Amerîkayê Donald Trump, Mark Savaya, û Serokwezîrê niha Mihemed Şîa Sûdanî de jî weke faktoreke giring tê dîtin, her çend ku piraniya komên Şîe li dijî ji nû ve destnîşankirina Sûdanî ne.
Ev nivîs 38 car hatiye xwendin.
