Sûriyeyê bi fermî Kosova nas kir
PeyamaKurd - Wezareta Karên Derve û Koçberan a hikûmeta demkî ya Sûriyeyê ragihand ku îro li paytext Riyadê, di navbera Sûriye, Erebistana Siûdî û Kosovayê de civînek sêalî pêk hat.
Daxuyaniyê rave kir ku di civînê de li ser xurtkirina têkiliyên dualî, organîzekirina çalakiyên balyozxaneyê û perspektîfên hevkariyê axivîn. Di daxuyaniyê de wiha hat gotin: "Di vê çarçoveyê de, Komara Erebî ya Sûriyeyê bi fermî Komara Kosovayê wekî dewletek serwer û serbixwe nas dike. Sûriye amadebûna xwe ya ji bo avakirina têkiliyên dualî li ser bingeha rêzgirtina hevbeş, xizmetkirina berjewendiyên her du gelan û xwesteka xwe ya beşdarbûna ewlehiya Balkanan û cîhanê tekez dike."
Daxuyaniyê tekez kir ku Sûriyeyê ev gav wekî beşek ji nirxandinek berfireh a siyaseta xwe ya derve avêtiye û tekez kir ku Sûriye ji bo hevkariyê bi hemî welatên cîhanê re vekirî ye, ku bi prensîbên rêzgirtina hevbeş, berjewendiyên hevpar û nedestwerdana di karûbarên navxweyî de tê rêvebirin.
Di daxuyaniyê de tekez kir ku naskirina serxwebûna Kosovayê "helwestek zelal û bêguman li ser navê cîhana Erebî" bû û wiha lê zêde kir, "Hikûmeta Şamê armanc dike ku di warên cûrbecûr de bi Komara Kosovayê re hevkariyê pêş bixe û hevrêziya dîplomatîk li ser platformên navneteweyî zêde bike da ku xizmeta berjewendiyên hevpar ên her du welatan û gelên wan bike."
Seroka Kosovayê Vjosa Osmani spasiya hikûmeta Sûriyeyê kir ji bo naskirina welatê wê.
Di daxuyaniya xwe de, Osmani ji hikûmeta Sûriyeyê re bi bîr xist ku Sûriyeyê bi rêya peymanek li Riyadê, paytexta Erebistana Siûdî, Kosova bi fermî nas kiriye.
Osmani spasiya Serokê Sûriyeyê Ehmed Şera kir ji bo biryara wî ya naskirina Kosovayê û piştgiriya wî ji bo gelê wê û got, "Gelên Kosova û Sûriyeyê ji bo bidestxistina azadiya xwe gelek êş kişandin û qurbanî dan. Ji ber vê yekê, naskirina hevbeş a îro ne tenê li ser serweriya dewletê ye, lê di heman demê de naskirina qurbaniyên ku ji hêla gelek nifşan ve ji bo jiyana azad hatine kirin e."
Osmani destnîşan kir ku Kosova niha ji hêla 120 welatan ve tê naskirin û tekez kir ku Komara Kosovayê berdewam dike û tiştek tune ku wê rawestîne.
