Macron ji bo navbeynkariya wî li Sûriyê spasiya Nêçîrvan Barzanî kir

PeyamaKurd – Koşka Elysée doh daxuyaniyek fermî weşand ku helwesta Fransayê li ser pêşeroja Sûriyê, pirsgirêka Kurd û Hêzên Demokratîk ên Sûriyê (HSD) diyar dike. Di daxuyaniyê de herwiha spasiya Nêçîrvan Barzani, Serokê Herêma Kurdistanê, ji bo hewldanên wî yên navbeynkariyê kir.

Fransayê diyar kir ku ji roja yekem a rûxandina rejîma Beşar Esed ve, ew berdewam piştgirîya hewldanên ji bo avakirina Sûriyeyek yekgirtî û serwer ku rêzê li hemî pêkhateyên wê digire kiriye.

Hewldanên dîplomatîk û navbeynkariya Nêçîrvan Barzanî

Li gorî daxuyaniya Koşka Elysée, Serokê Fransayê vê dawiyê rêze axaftinên telefonê bi aliyên sereke re, di nav de Serokê Sûriyê Ehmed Şera û Fermandarê Giştî yê HSDê General Mazlûm Ebdî, pêk anî.

Serokê Fransayê bi fermî spasiya Nêçîrvan Barzanî, Serokê Herêma Kurdistanê, ji bo hewldanên wî yên navbeynkariyê di navbera aliyan de [li Sûriyê] kir.

Koşka Elysée tekez kir ku ev hevrêzkirin armanc dike ku çareseriyek mayînde bibîne ku di berjewendiya ewlehiya herêmê û Ewropa û Amerîkayê de be.

Agirbest û yekbûna HSDê

Fransa daxwaza agirbesteke mayînde û pêkanîna Peymana 18ê Çile li ser bingeha parastina yekparçeyiya axa Sûriyeyê û rêzgirtina li hemû pêkhateyan, bi taybetî Kurdan, kir.

Di daxuyaniyê de hat gotin, "Fransa ji bo yekbûna siyasî, îdarî, leşkerî û aborî ya Hêzên Demokratîk ên Sûriyeyê hewl dide û piştgirî dide wê, lê ev yek divê bi zorê û li ser hesabê ewlehiya nifûsa sivîl li Kobanî an Hesekê neyê kirin." Herwiha hişyarî da ku agirbest hîn jî hassas e û divê ji her aloziyeke nû dûr bisekinin.

Ewlehiya zindanên DAIŞê

Di derbarê rewşa ewlehiyê de, Fransayê tekez kir ku di çarçoveya Hevpeymaniya Navneteweyî ya li dijî DAIŞê de ji bo misogerkirina ewlehiya girtîgehan û veguhestina bi rêkûpêk a girtiyan pêwîstiya hevrêziyê heye.

Qesra Elysée diyar kir, "Şer û pevçûnên dawî û êrîşên berdewam ên li dijî HSDê bandorek neyînî li ser kontrola girtîgehên ku terorîst lê ne kirine."

Daxuyanî bi pesnê Serokê Fransayê da ku pabendbûn û wêrekiya Hêzên Demokratîk ên Sûriyeyê di şerê li dijî DAIŞê de û got ku divê ev fedekarî neyên pirsîn.

Fransa herwiha diyar kir ku Sûriye niha endamek çalak ê Hevpeymaniya Navneteweyî ye û divê pabend be bi berdewamiya şerê li dijî DAIŞê li kêleka hevalbendan da ku berjewendiyên ewlehiyê yên herêm û cîhanê biparêze.