سوریا مۆڵەت دەدات بە ڕێکخراوێک کە گرنگی بە پاراستنی کەلەپووری جولەکە و گەڕاندنەوەی موڵک و ماڵیان دەدات

پەیامی کورد- دیمەشق... سوریا مۆڵەت دەدات بە ڕێکخراوێک کە گرنگی بە پاراستنی کەلەپووری جولەکە و گەڕاندنەوەی موڵک و ماڵیان دەدات

وەزارەتی کاروباری کۆمەڵایەتی و کاری حکومەتی سوریا، ئەمڕۆ چوارشەممە ڕایگەیاند کە مۆڵەتی بەخشیوە بە ڕێکخراوێک کە گرنگی بە پاراستنی کەلەپووری جولەکە دەدات لە وڵاتەکەدا، و بەپێی قسەی یەکێک لە دامەزرێنەرانی، کار دەکات بۆ گەڕاندنەوەی موڵک و ماڵی ئەم پێکهاتەیە کە لەلایەن دەسەڵاتدارانی پێشووەوە دەستیان بەسەردا گیرابوو.

هیند قەبەوات، وەزیری کاروباری کۆمەڵایەتی سوریا بۆ ئاژانسی فرانس پرێسی ئاشکرا کرد کە "ڕێکخراوی کەلەپووری سوریی جولەکە" ڕاگەیەندراوە، و ڕوونیکردەوە کە ئەمە یەکەم ڕێکخراوە گرنگی بە میراتی جولەکە دەدات و مۆڵەتی لە دەسەڵاتدارانی نوێ وەرگرتووە.

قەبەوات جەختی لەوە کردەوە کە "ئەمە پەیامێکی بەهێزە لە دەوڵەتی سوریاوە کە ئێمە جیاوازی لە نێوان ئایینێک و ئایینێکی دیکەدا ناکەین"، و ئەوەشی زیاد کرد کە "سوریا هاوکاری هەموو پیاوان و ژنانی سوری دەکات لە هەموو ئایین و مەزهەبەکان کە دەیانەوێت دەوڵەتە نوێیەکەمان بونیاد بنێن".

لەم چوارچێوەیەدا، هێنری حەمرە کە یەکێکە لە دامەزرێنەرانی ڕێکخراوەکە و کوڕی یوسف حەمرەیە (کۆتا حاخام کە سوریای بەجێهێشت)، ڕایگەیاند: "کار دەکەین بۆ ئامارکردنی موڵک و ماڵی جولەکەکان و گەڕاندنەوەی ئەوانەی لە سەردەمی ڕژێمی پێشوودا دەستیان بەسەردا گیرابوو، هەروەها پاراستنی شوێنە پیرۆزەکان و چاودێریکردن و نۆژەنکردنەوەیان تا بۆ هەموو جولەکەکانی جیهان بۆ سەردانکردن بەردەست بن".

هەروەها مەعاز مستەفا، بەڕێوەبەری جێبەجێکاری ڕێکخراوی سوری بۆ فریاگوزاری وتی: "تا ئێستا دەیان خانوومان لە موڵک و ماڵی جولەکەکان ئامار کردووە کە لەلایەن ڕژێمی لەناوچووی بەشار ئەسەدەوە لێیان زەوت کرابوو".