هێزەکانی سوپای ئیسرائیل دەچنە ناو خاکی سووریاوە

پەیامی کورد- دیمەشق...هێزەکانی سوپای ئیسرائیل دەچنە ناو خاکی سووریاوە

 هێزەکانی ئیسرائیل بە 6 ئۆتۆمبێلی سەربازییەوە چوونە نێو گوندی "سەیدا ئەلحانوت" لە گوندەواری باشووری قونەیتیرە لە باشووری سووریا.

کەناڵی "ئیخبارییە"ی سووری، ئەمڕۆ شەممە، ڕایگەیاند کە هێزەکانی ئیسرائیل "4 ماڵیان پشکنیوە و 4 بازگەیان داناوەتەوە".

نزیکەی دوو هەفتە لەمەوبەریش، هێزەکانی ئیسرائیل 13 کەسیان کوشت و نزیکەی 25 کەسی دیکەیان بریندار کرد لە شارۆچکەی "بەیت جن" کە دەکەوێتە داوێنی چیای شێخ (جەبەل ئەلشێخ) لە گوندەواری دیمەشق.

لە دوای ڕووخانی ڕژێمی ئەسەدەوە، ڕۆژانە بە شێوەیەکی نیمچە بەردەوام هاتنەنێو ئیسرائیل بۆ ناو گوندەواری قونەیتیرە و دەرعا تۆمار دەکرێت، کە پڕۆسەی دەستگیرکردنی لەگەڵدایە؛ هەندێک لە دەستگیرکراوەکان پاشان ئازاد کراون، لە کاتێکدا هەندێکی تریان هێشتا لە زینداندان.

هەروەها خاڵە سەربازییەکانی ئیسرائیل لە سووریا لە لوتکەی چیای شێخەوە تا دەگاتە ناوچەی حەوزی یەرمووک لە دوورترین خاڵی گوندەواری باشوور کە هاوسنوورە لەگەڵ پارێزگای دەرعا بڵاوبوونەتەوە. بەپێی "ئیخبارییە"، ژمارەیان هەشت سەربازگەیە لە قونەیتیرە و یەک سەربازگەش لە دەرعا.