نێچیرڤان بارزانى و باڵیۆزى به‌ریتانیا دۆخى ناوچه‌كه‌یان تاوتوێ کرد
پەیامی کورد ... نێچیرڤان بارزانى و باڵیۆزى به‌ریتانیا دۆخى ناوچه‌كه‌یان تاوتوێ کرد
چوارشه‌ممه 2025/6/25 نێچیرڤان بارزانى، سه‌رۆكى هه‌رێمى كوردستان، پێشوازی له ئیرفان سدیق باڵیۆزى به‌ریتانیا له عێراق كرد.
له كۆبوونه‌وه‌یه‌كدا په‌یوه‌ندییه‌كانى به‌ریتانیا له‌گه‌ڵ عێراق و هه‌رێمى كوردستان، گفتوگۆى هه‌ولێر ـ به‌غدا بۆ چاره‌سه‌ركردنى كێشه‌كانى نێوانیان، دۆخى ناوخۆى كوردستان و هه‌وڵه‌كانى پێكهێنانى كابینه‌ى نوێى حكوومه‌تى هه‌رێمى كوردستان، تاوتوێ كران، هه‌روه‌ها ده‌رباره‌ى دوایین پێشهاته‌كانى دۆخى ڕۆژهه‌ڵاتى ناوه‌ڕاست، بیروڕایان گۆڕییه‌وه.
هه‌ردوولا جه‌ختیان له بره‌ودان به په‌یوه‌ندییه‌كان و فراوانكردنى هاوكاری هاوبه‌شى به‌ریتانیا له‌گه‌ڵ عێراق و هه‌رێمى كوردستان له بواره جیاجیاكاندا كرده‌وه، هه‌روه‌ها له‌سه‌ر گرینگی چاره‌سه‌ركردنى كێشه‌كانى هه‌ولێر ـ به‌غدا به گفتوگۆ و لێكگه‌یشتن و په‌له‌كردن له پێكهێنانى كابینه‌ى نوێى حكوومه‌تى هه‌رێمى كوردستان، هاوڕا بوون.
ده‌رباره‌ى پێشهاته‌كانی ڕۆژهه‌ڵاتى ناوه‌ڕاستیش دووپاتیان كرده‌وه كه چاره‌سه‌رى ئاشتییانه‌ى كێشه‌كان و گرتنه‌به‌رى گفتوگۆ و ڕێگه دیپلۆماسییه‌كان، له به‌رژه‌وه‌ندی هه‌موو لایه‌نه‌كان و ته‌واوى ناوچه‌كه‌دایه و ئارامى و سه‌قامگیرى ده‌پارێزێت.
په‌یوه‌ندییه‌كانى عێراق و هه‌رێمى كوردستان له‌گه‌ڵ ووڵاتانى دراوسێ و ناوچه‌كه و چه‌ند پرسێكى جێی بایه‌خى هاوبه‌ش، ته‌وه‌رێكى دیكه‌ى كۆبوونه‌كه بوو كه كونسووڵى گشتی به‌ریتانیا له هه‌رێمى كوردستان، ئاماده‌ى بوو.
ئەم بابەتە 25 جار خوێندراوەتەوە
