Iraq: Hizbullah û Hûsî di lîsteya terorê de dimînin

PeyamaKurd –  Li gorî lêkolîneke nû ya li ser tomarên fermî yên Iraqê, tevî guhertinên siyasî, komên wekî Hizbullah û Hûsiyan di “lîsteya terorê” de mane. Wezareta Dadê ya Iraqê lîsteya cemidandina mal û milkên 142 kes û 24 koman diparêze.

Lêkolîna rojnamevanê Rûdawê Hîwa Cemal a li ser hejmara 4848an a Rojnameya Fermî (El-Vekayî el-Iraqiyye), hûrgiliyên ku ji çavên raya giştî dûr mabûn eşkere kirin.

Lîsteyên herêmî û navneteweyî

Di biryarên hatine weşandin de, lîste di bin du kategoriyan de hatiye dabeşkirin:

1. Lîsteya Herêmî: Di bin sernavê “Terorîstên Herêmî” de 63 welatiyên Iraqî hene. Piraniya van kesan Sunnî ne û xelkê parêzgehên wekî Enbar, Mûsil, Selahedîn û Diyalayê ne ku bi endamtiya DAIŞê têne tohmetbarkirin.
2. Lîsteya Navneteweyî: Di vê beşê de 76 welatiyên biyanî hene ku piranî ji Malezya, Endonezya û Fîlîpînan in. Her wiha 24 rêxistin û komên ku li zêdetirî 25 welatan çalak in, di vê lîsteyê de cih digirin. Di nav wan de Hizbullah û Hûsî jî hene.

Sedemên cezakirinê

Li gorî belgeyên fermî, sedemên xistina nav lîsteyê û cemidandina mal û milkan di bin çar sernavan de kom bûne: Girêdanên bi DAIŞ û El Qaîdeyê re, fînansekirina terorê, cîbicîkirina biryarên navneteweyî û binpêkirina yasayên “şûştina pereyan”.