Trump-Netanyahu li Qesra Spî sêyemîn hevdîtin pêk anîn
PeyamaKurd - Donald Trump û Benjamin Netanyahu li Qesra Spî civiyan. Trump got ku ew dikarin hefteya bê bi Îranê re hevdîtinekê bikin. Serokê Amerîkayê destnîşan kir ku "li Xezzeyê tu astengiyek ji bo agirbestê tune."
Trump di şîvê de pirsên rojnamevanan bersivand û derbarê hewldanên agirbestê yên li Xezzeyê de got, "Em li ser rêya aştiyê li Xezzeyê ne. Em pir hêvîdar in. Hamas jî agirbestê dixwaze. Tu astengiyek ji bo agirbesta Îsraîl-Hamasê tune," û destnîşan kir ku "tişt pir baş pêşve diçin." Nûnerê Taybet ê Trump ê Rojhilata Navîn Steve Witkoff got, "Li Xezzeyê derfetek ji bo aştiyê heye."
Netanyahu got, "Em bi Amerîkayê re dixebitin da ku welatên ku wê ji bo Filistîniyan pêşerojek çêtir pêşkêş bikin bibînin."
"Ez hêvî dikim ku em neçar nebin ku vê bikin"
Trump derbarê krîza bi Îranê û şerê 12 rojan de got, "Me bi Îranê re hevdîtin plan kirin û ew dixwazin biaxivin. Derbeke mezin li wan hatiye xistin." Dema ku ji Trump hat pirsîn ka planên êrîşeke din li ser Îranê hene an na, wî bersiv da, "Ez hêvî dikim ku em neçar nebin ku vê bikin."
Wî herwiha got ku wan li ser daxwaza welatên herêmî û Netanyahu cezayên li ser Sûriyeyê rakirine û bi vê yekê ew "dixwazin şansekê bidin" rêveberiya Şamê.
Ji bo Xelata Nobelê hat berbijêrkirin
Ji aliyekî din ve, Netanyahu got ku wî berî civînê Trump ji bo Xelata Aştiyê ya Nobelê berbijêr kiriye û nameya xwe ya berbijêrkirinê daye Trump.
