Rejîma Îranê li Serdestê tîmeke rojnamegeriyê ya Herêma Kurdistanê binçav kir

PeyamaKurd – Li gorî zanyariyên ku gihîştine Rêxistina Mafên Mirovan a Hengawê, hêzên îstixbarata Sipaha Pasdaran a Rejîma Îranê (IRGC) li bajarê Serdeştê yê Rojhilatê Kurdistanê, peyamnêrê Awa TVyê û tîma wî binçav kirin.

Hate ragihandin kuroja Çarşemê, 3yê Kanûna Pêşîn a 2025an,  rojnamevan Omer Ehmedê ku weke nasnav “Rasûka” jî tê naskirin, li gel çar wênekêş û hevkarên xwe yên medyayî hatin girtin.

Omer Ehmed xelkê navçeya Qeladizê ya Herêma Kurdistanê ye.

Hate zanîn ku tîma rojnamevaniyê ji bo şopandina roja duyemîn a “Festîvala Beyt û Heyran”ê li Serdeştê bûne û di dema karê xwe de rastî midaxeleyê hatine.

Hengawê tekez kir ku heta dema amadekirina nûçeyê, rayedarên Komara Îslamî ya Îranê derbarê bûyerê de tu daxuyanî nedane. Sedema girtinê û ew tohmetên ku arasteyî rojnamevanan hatine kirin, hîn ne diyar in.