Li zindanên Efrînê zext û zordarî: Axaftina bi Kurdî qedexe ye û hevdîtin bi pere ne
PeyamaKurd – Li gorî agahiyên dawî, li zindanên Efrîna Rojavayê Kurdistanê ku di bin kontrola komên çekdar de ye, zextên li ser girtiyên Kurd gihîştine asta herî jor. Seroka Komeleya Lêlûn, Lonjîn Ebdoyê radigand ku ne tenê destûr nayê dayîn girtî bi malbatên xwe re bi zimanê Kurdî biaxivin, lê malbat neçar dimînin ji bo hevdîtinên çend deqeyan pereyan jî bidin.
Lonjîn Ebdoya beşdarî bernameyeke televîzyonê bû, rewşa giran a mafên mirovan li Efrînê anî ziman. Wê da zanîn ku girtî tenê dikarin ji her du hefteyan carekê û her carê bi qasî 5 deqeyan malbatên xwe bibînin. Di van hevdîtinên kurt de, "axaftina bi Erebî mecbûrî ye."
Ebdoyê bal kişand ser pirsgirêkên ku ji ber vê qedexeyê derdikevin û got, "Hin dayik bi Erebî nizanin ji lewma ev yek ji bo wan dibe astengiyeke mezin." Wê herweha eşkere kir ku malbat ji bo her hevdîtineke 5 deqeyî neçar in 500 lîreyên Tirkî bidin komên çekdar.
Ebdoyê diyar kir ku hema hema ji her malbateke Kurd li Efrînê kesek hatiye girtin û sedema girtina wan bi giştî wek "xebata bi Rêveberiya Xweser re" tê nîşandan. Li gorî daneyên ku wê parve kirin:
- Ji sala 2018an ve, çarenûsa 50 kesî li Efrînê nediyar e.
- Heya niha 300 kes di zindanan de ne, ku ji wan nêzîkî 90 jin in.
Wê wek mînak behsa du jinan kir ku ji sala 2020î ve li Girtîgeha Raî girtî ne, ku li her yekê ji wan 13 sal cezayê zindanê hatiye birrîn.
Girtîgeha Raî, ku gelek girtiyên Efrînê lê têne ragirtin, di bin kontrola koma çekdar a "Sultan Murad" de ye. Ebdoyê destnîşan kir ku milîsên çekdar bi heqaret û zextên derûnî rewşa girtiyan girantir dikin.
Ev nivîs 90 car hatiye xwendin.
