Barrack: YPG êdî ne girêdayî PKKyê ye û hevalbenda Amerîkayê ye
PeyamaKurd – Nûnerê Taybet ê Amerîkayê ji bo Sûriyeyê, Thomas Barrack, di daxuyaniyên xwe yên dawî de polîtîkayeke nû ya Amerîkayê li hember Rojavayê Kurdistanê eşkere kir. Barrack ragihand ku Yekîneyên Parastina Gel (YPG) "êdî ne girêdayî PKKyê ye" û weke "hevalbenda Amerîkayê" ye. Ev gotin weke guherîneke giring di siyaseta Amerîkayê de tê dîtin, ku demeke dirêj hewl dida hevsengiyê di navbera hevkariya xwe ya bi Hêzên Sûriya Demokratîk (HSD) re û peywendiyên xwe yên bi Tirkiyeyê re çêbike.
Di hevpeyvîneke berfireh de, Barrack bal kişand ser tevliheviya siyaseta herêmê û got: "Tirkiye hevalbenda me ye û PKKyê weke rêxistineke terorîst dibîne, ku Amerîka jî vê pênaseyê qebûl dike. Lê belê, YPG û HSD, ku di şerê dijî DAIŞê de hevkarên me yên sereke bûn, êdî ne girêdayî wê rêxistinê ne, tevî ku rehên wan ji wir tê."
Barrack, Tirkiyê weke "dost û hevalbendeke dilsoz" û duyemîn hevkarê herî mezin ê NATOyê bi nav kir. Wî amaje bi pêvajoya diyalogê ya di navbera Fermandarê Giştî yê HSDyê Mezlûm Ebdî û berpirsên payebilind ên Tirk, Hakan Fîdan û Îbrahîm Kalin de kir û ev weke gaveke berpirsane ji bo pêkanîna aştiyê nirxand.
Siberoja Sûriyeyê û siyaseta herêmî
Derbarê paşeroja Sûriyeyê de Barrack baweriya xwe bi serokê Sûriyê Ehmed El-Şera anî ku dikare welat ber bi "aramî, ewlehî û geşedanê" ve bibe. Wî tekez kir ku armanca Amerîkayê ne "guhertina rejîmê" ye, lê belê "têkoşîna li dijî terorê" ye. Barrack herweha behsa zehmetiyên avakirina hikûmeteke navendî kir ji ber ku Kurd, Druzî, Ereb û Elewî xwedî daxwazên cihê ne.
Li ser gefên herêmî, nûnerê Amerîkayê îdiayên ku Îsraîl dixwaze Sûriyeyê yan Lubnanê dagîr bike weke "bêwate" bi nav kir û got ku piştî 7ê Cotmehê têgihîştina Îsraîlê ya ji bo ewlehiyê bi temamî guheriye.
Di mijara Hizbullahê de, Barrack diyar kir ku bêçekkirina wê ne mimkin e û pêşniyar kir ku ji bo kêmkirina bandora Îranê, divê derfetên aborî ji civaka Şie re bên peydakirin. Wî hişyarî da ku Amerîka û Îsraîl dê rê nedin ku Îran piştgiriya xwe ya ji bo komên weke Hizbullah, Hemas û Hûsiyan bidomîne.
Di dawiyê de, Barrack bang li serokên herêmê kir ku pirsgirêkên kevin li pey xwe bihêlin û bi rêya diyalog û hevkariya aborî, siberojeke nû ava bikin.
Ev nivîs 131 car hatiye xwendin.
