سەرۆک بارزانی لە دهۆک لەگەڵ ژەنەڕاڵ مەزلوم عەبدی کۆدەبێتەوە

سەرۆک مەسعوود بارزانی دوێنێ چوارشەممە لە شاری دهۆک لە هەرێمی کوردستان لەگەڵ جەنەڕاڵ مەزلوم عەبدی، فەرماندەی گشتی هێزەکانی سوریای دیموکرات کۆبووەوە.
پێشتریش لەو ڕۆژەدا، عەبدی بەشداریی لە کۆڕبەندی ئاشتی و ئاسایشی ڕۆژهەڵاتی ناوەڕاست (MEPS) کرد، کە لەلایەن زانکۆی ئەمریکی دهۆکەوە لە هەرێمی کوردستانی عێراق ڕێکخرابوو.
لە میانی دیدارەکەدا سەرۆک مەسعوود بارزانی جەختی لە پێویستی چارەسەرکردنی پرسی کورد بە شێوەیەکی دیموکراسی و ئاشتیانە لە چوارچێوەی سوریای نوێ و چارەسەرکردنی هەڵەکانی ڕابردوو و ڕێگریکردن لە دووبارەبوونەوەیان کردەوە.
هەروەها لە کۆبوونەوەی نێوان سەرۆک بارزانی و جەنەڕاڵ عەبدی، سەرۆکی ئەنجومەنی نیشتمانیی کورد، محەمەد ئیسماعیل، ئەندامی پێشووی پەرلەمانی تورکیا و سیاسەتمەداری کورد عوسمان بایدەمیر و ژمارەیەک کەسایەتی و بەرپرسی دیکەی ڕۆژئاوای کوردستان ئامادەبوون.
لە میانی دیدارەکەدا کە ئاڵوگۆڕی بیروڕا لەبارەی دۆخی سوریا و ناوچەکەی لەخۆگرتبوو، بارزانی خۆشحاڵی خۆی بە بەشداری شاندەکانی هێزەکانی سوریای دیموکرات و ئەنجوومەنی نیشتمانی کورد لە کۆڕبەندی ئاشتی و ئاسایشی ڕۆژهەڵاتی ناوەڕاست لە دهۆک دەربڕی.
لای خۆیەوە عەبدی سەرۆکی حکومەتی هەرێمی کوردستان سوپاسی مەسرور بارزانی کرد بۆ بانگهێشتکردنی بۆ بەشداریکردن لە کۆڕبەندی MEPS 2025 و باسی لە ڕۆڵی سەرۆک بارزانی و هەوڵەکانی کرد بۆ پەرەپێدانی لێکنزیکبوونەوە و یەکڕیزی نێوان لایەنە کوردستانییەکان لە سوریا.