Keleha Nizarkê ya Dihokê dibe Muzexaneya Neteweyî ya Bîranîna Enfalê

PeyamaKurd – Keleha Nizarkê li Dihokê, ku di dema rejîma Beasê de wekî navendeke eşkenceyê û zindaneke bi nav û deng dihat naskirin, niha di qonaxeke dawî ya projeyeke mezin a nûjenkirinê de ye da ku bibe Muzexaneya Neteweyî ya Bîranînê. Armanca sereke ya projeyê parastina dîroka tarî ya vê derê û bibîranîna qurbaniyên Komkujiya Enfalê û tawanên din ên li dijî gelê Kurd e.

Keleha Nizarkê ya ku dora sala 1988an de hatiye avakirin û rûberekî wê 36 hezar metre çargoşe ye, di dema jenosîda Enfalê de wekî navendekê ji bo girtin û êşkencekirina bi hezaran welatiyên sivîl ên Kurd dihat bikaranîn.

Karên nûjenkirinê bi lez didomin û qonaxa duyemîn %95 temam bûye. Ji bo her du qonaxan nêzîkî 900 milyon dînara Iraqî hatiye veqetandin.

Nivîsên girtiyan tên parastin 

Rêveberên projeyê tekez dikin ku armanca nûjenkirinê ne jêbirina rabirdûyê, lê zindîhiştina wê ye. Hewl tê dayîn ku dîwarên resen, tevî nivîs û kolanên ku ji aliyê girtiyan ve wekî îfadeya berxwedan û êşê hatine hiştin, bi hûrgilî werin parastin.

Ebdulqadir Mihemed, serperiştiyarê projeyê, diyar kir ku ew dîwarên bi nivîs hatine, bi bikaranîna boyaxa plastîkî ya taybet hatine parastin.

Muzexaneya civakî ya nimûneyî

Hesen Fetah, Berdevkê Rêveberiya Rewşenbîrî û Hunerî ya Dihokê, ji K24ê re got ku ev muzexane dê wekî "muzexaneyeke civakî ya nimûneyî" be û taybet be ji bo parastina bîranîna Kurd.

Fetah piştrast kir ku muzexane dê ne tenê bîranîn û kelûpelên Enfalê bigire nava xwe, lê her wiha belgeyên Komkujiya Enfalê, kimyabaranê, û karesata Şingalê jî nîşan bide.

Hûrgiliyên nûjenkirinê

Projeya nûjenkirinê avakirina dîwarekî parêzvanî yê derve, nûjenkirina dewrûberê, û danîna pencereyên cam bi şêweyekî klasîk li xwe digire. Her wiha, platform û holên pêşandanê tên amadekirin da ku kelûpel, belgeyên wênesazî û dîrokî yên ku çîrokên bi êş ên girtiyan û dîroka zordestiya rejîma Baesê vedibêjin, tê de werin bicîkirin.

Ev nivîs 38 car hatiye xwendin.