Amerîka bi pakêteke 179 milyon dolarî piştgiriya sîstema Patriotê ya Ûkraynayê xurt dike
PeyamaKurd – Dewletên Yekbûyî yên Amerîkayê (DYA) ragihand ku firotina pakêteke nû ya piştgiriyê bi bihayê 179.1 milyon dolarî ji bo sîstemên parastina asmanî yên Patriot ên Ûkraynayê pejirandiye.
Ev pêngav bi armanca misogerkirina domdarî û xurtkirina şiyana berevaniyê ya Ûkraynayê li hemberî gefên asmanî tê avêtin.
Li gorî daxuyaniya nivîskî ya Ajansa Hevkariya Ewlehiya Parastinê (DSCA) ya ser bi Wezareta Parastinê ya DYAyê ve, Wezareta Derve ev firotin pejirandiye da ku Ûkrayna bikare li hemberî êrîşên heyî û yên paşerojê bi awayekî bibandortir xwe biparêze.
Di daxuyaniyê de hat tekezkirin ku ev alîkarî dê hevsengiya leşkerî ya li herêmê neguherîne, lê dê piştgiriyê bide mîsyonên ewlehiya herêmî.
Naveroka pakêta piştgiriyê
Pakêta ku hatiye pejirandin, ne firotina sîstemeke nû, lê xizmet û kelûpelên pêwîst ji bo sîstemên heyî yên Patriotê li xwe digire. Di vê çarçoveyê de dê ev tişt ji Ûkraynayê re werin peydakirin:
- Parçeyên yedek û alavên ceribandinê
- Piştgiriya teknîkî, endezyarî û lojîstîkê
- Nûkirina nermalavê û guherandinên pergalê
Xizmetkarên entegrasyonê û perwerdehiyê
Peymankarên sereke yên ku dê vê peymanê bi cih bînin, dê şirketên mezin ên Amerîkî yên wekî RTX Corporation û Lockheed Martin bin. Herweha, ji bo cîbicîkirina projeyê, tê payîn ku tîmek ji 5 berpirsên hikûmetê û 15 nûnerên şirketan serdana herêma Fermandariya Ewropayê ya Amerîkayê (EUCOM) bikin da ku beşdarî civînên perwerdehiyê û teknîkî bibin.
Ev nivîs 86 car hatiye xwendin.
