Amerîka ji bo aştiya mayînde ya navbera Îsraîl û Îranê li Pakistanê dicive

PeyamaKurd – Wezîrê Derve yê Amerîkayê Marco Rubio û Serokwezîrê Pakistanê Şehbaz Şerîf  bi telefonê hevdîtinek pêk anîn û li ser avakirina aştiyeke mayînde di navbera Îsraîl û Îranê de gotûbêj kirin.

Ev hevdîtin piştî ragihandina agirbestê ya Serokê Amerîkayê Donald Trump pêk hat, ku armanca wê rawestandina şerê di navbera Îsraîl û Îranê de ye, ku bi êrîşa Îsraîlê ya 13ê Hezîranê li ser Îranê dest pê kir.

Trump, di hefteya borî de li Qesra Spî bi Serfermandarê Artêşa Pakistanê Marşal Asim Munir re civiya û diyar kir ku Pakistan xwedî zanyariyên kûr e derbarê Îranê de. Îran, ku têkiliyên dîplomatîk bi Dewletên Yekbûyî re nîne, berjewendiyên xwe bi rêya beşek ji Balyozxaneya Pakistanê ya li Washingtonê temsîl dike.

Wezareta Derve ya Amerîkayê ragihand: "Herdu serok pêdiviya hevkariyê ji bo avakirina aştiyeke domdar di navbera Îsraîl û Îranê de bi zelalî nîşan dan." Rubio bi tundî destnîşan kir ku divê Îran bi tu awayî çekên navokî bi dest nexe an jî pêş nexe.

Pakistanê êrîşên Îsraîl û Amerîkayê li ser Îranê şermezar kirin, lê di destpêka vê mehê de ragihand ku ew ê Donald Trump ji bo Xelata Aştiyê ya Nobelê berbijêr bike ji ber rola wî di bidawîkirina pevçûna çar rojî ya di navbera Hindistan û Pakistanê de di meha borî de.

Ev nivîs 75 car hatiye xwendin.