Nûnerê NYyê: Gendelî li Iraqê gihîştiye asta metirsîdar

PeyamaKurd – Nûnerê Taybet ê Neteweyên Yekbûyî (NY) yê li Iraqê, Dr. Mihemed el-Hesen, îro, roja Şemiyê 30ê Tebaxa 2025an, hişyariyeke tund da û ragihand ku gendelî li seranserê welat bi awayekî berfireh belav bûye û gefê li aramiya Iraqê dixwe.

Di axaftineke xwe de ya li Kerbelayê, Dr. El-Hesen diyar kir ku "şerê li dijî gendeliyê berpirsiyariyeke olî û exlaqî ye" û tekez kir ku "civakên gendel nikarin li ser piyan bisekinin." Nûnerê NYyê bal kişand ser wê yekê ku tirsa wî ya mezin heye ku gendelî li Iraqê bê kontrol belav bibe, û got ku ev pirsgirêk ne tenê di warê siyasî de ye, lê di heman demê de "gendeliya darayî, exlaqî, dadwerî û îdarî" jî li xwe digire.

El-Hesen da zanîn ku ji bo çareserkirina vê pirsgirêka kûr, divê pîvanên wekî destpakî, serxwebûna dadweriyê û şefafiyet bi awayekî cidî werin bihêzkirin. Wî herweha banga hesabpirsînê ji berpirsên gendel kir û got ku divê ew kesên ku destê wan di gendeliyê de heye, bên cezakirin.

Ev daxuyanî piştî wê yekê ye ku Iraq di qada navneteweyî de wek yek ji welatên herî gendel tê dîtin, û ev rewş bandoreke neyînî li ser jiyana welatiyan û pêşketina aboriya welat dike.

Ev nivîs 75 car hatiye xwendin.