Ji bo rûbirûbûna gefên DAIS û Îranê: Rêveberê li dijî terorê yê Amerîkayê li Rojavayê Kurdistanê ye

PeyamaKurd – Rêveberê Navenda Neteweyî ya Dijî Terorê ya Amerîkayê (NCTC), Joe Kent, serdaneke giring li Rojavayê Kurdistanê û Iraqê pêk anî. Di çarçoveya serdanê de, Kent li gel hevkarên Amerîkî û hêzên herêmî yên ku di eniya şerê li dijî DAIŞ, El Qaîde û komên çekdar ên girêdayî Îranê de ne, civiya û piştgiriya Washingtonê ji bo wan dubare kir.

Piştî bidawîbûna gera xwe, Joe Kent bi rêya hesabê xwe yê  Xê  daxuyaniyek belav kir û bal kişand ser serkeftinên hevpar. Wî got, "Ez ji pêşketina ku hêzên ku ji hêla DYA ve têne piştgirîkirin li her du welatan bi dest xistine, îlham girtim. Pabendbûna wan a bi têkoşîna hevbeş a li dijî terorîzmê re cihê pesnê ye."

Peyama stratejîk a serdanê

Serdana Kent weke peyameke eşkere ya pabendbûna Amerîkayê bi berdewamiya hevkariya ewlehiyê li Rojavayê Kurdistanê û Iraqê re tê şirovekirin. Ev serdan di demekê de pêk tê ku çalakiyên şaneyên DAIŞê li deverên beyaban û êrîşên komên çekdar ên girêdayî Îranê li ser baregehên Amerîkî û Hevpeymaniya Navneteweyî zêde bûne.

Kentê ku efserê berê yê Hêzên Taybet ên Amerîkayê ye, stratejiya nû ya Amerîkayê ya li dijî terorê weke yekî li ser bingeha bihêzkirina hevkarên herêmî li şûna "şerên bêdawî" pênase dike. Di vê çarçoveyê de, serdana wî weke pêngaveke pratîkî tê dîtin ku tê de piştgiriya ji bo hêzên weke Hêzên Sûriya Demokratîk (HSD) li Rojavayê Kurdistanê û hêzên ewlehiyê yên Iraqê careke din tê piştrastkirin.

Di beşeke din a daxuyaniya xwe de, Kent bi awayekî taybet behsa hevdîtina xwe ya bi Hêzên Taybet ên Iraqê û Dezgeha Dijî Terorê (CTS) re kir. Wî bi bîr xist ku ew û tîma wî di sala 2003yan de di damezrandina van hêzan de alîkar bûne û got, "Me paşê li Bexda, Fellûce û Mûsilê mil bi mil şer kir. Ew şervanên bêhempa ne." 

 

Ev nivîs 41 car hatiye xwendin.