Mesûd Barzanî ji endamê ENKSê Oso re: Paşeroja Sûriyê bê Kurdan nabe!
PeyamaKurd - Serok Mesûd Barzanî, di hevdîtinekê de bi şandeke Encumena Neteweyî ya Kurdên Sûriyê (ENKS) re, piştgiriya wan a aştiyane ji bo mafên Kurdan li Sûriyê tekez kir û got, "Paşeroja Sûriyê bê Kurdan nabe."
Serok Mesûd Barzanî li navçeya Pîrmam a Hewlêrê pêşwaziya şandeke Encumena Neteweyî ya Kurdên Sûriyê kir. Şande ji sekreterên giştî yên partiyên siyasî yên di nav ENKSê de pêk dihat.
Li gorî daxuyaniyek ji ofîsa Barzani, her du aliyan nêrînên xwe li ser rewşa siyasî ya herêmê û pêşketinên dawî yên li Sûriyê û Rojava parve kirin.
Endamê Encumena Serokatiyê ya ENKSê Silêman Oso diyar kir ku hevdîtina wî bi Mesûd Barzanî re erênî bû û got, "Serok Barzanî guh da nêrînên me li ser rewşa giştî ya Sûriyê û bi taybetî li ser Rojava."
Wî herwiha diyar kir ku Serok Barzanî "behsa Konferansa Yekîtî û Helwesta Hevbeş a Kurdan û encamên wê kir, wê wekî destkeftiyek girîng ji bo Kurdan bi nav kir ku divê were parastin."
Wî herwiha got: "Serok Barzanî tekezî li ser têkiliyên di navbera pêkhateyan û têkiliya Kurdan bi Ereb û pêkhateyên din ên li Sûriyeyê re kir û diyar kir ku divê Kurd dengê her kesî temsîl bikin."
Oso got ku Serok Barzanî diyar kiriye ku ew bi awayekî aştiyane piştgiriyê didin mafên Kurdan li Sûriyeyê û bêyî Kurdan Sûriyeyeke pêşerojê nikare hebe.
