Sîpan Hemo: Heta sîstema nenavendî çênebe entegrasyona HSDê bêwate ye

PeyamaKurd- Endamê Fermandariya Giştî ya Hêzên Sûriyeya Demokratîk (HSD) Sîpan Hemo, li ser mijara entegrasyona hêzên leşkerî bi artêşa nû ya Sûriyê re, helwesta Hêzên Sûriya Demokratîk (HSD) eşkere kir.

Hemo got, ew yekxistina li ser bingeha xweradestkirinê red dikin û tenê ‘yekxistina demokratîk’ qebûl dikin. 

Sîpan Hemo di hevpeyvînekê de diyar kir, têgihîştina HSDê ya ji bo "yekxistinê" ji ya aliyên din cuda ye û wiha got: "Yekxistina herî baş ew e ku bi îradeya gelan û li ser bingeha hişmendiyeke azad pêk tê. Lê belê, nêrîna li Şamê serwer e, li ser esasê 'Divê her kes tevlî dewleta navendî bibe' hatiye avakirin. Ev hişmendiyeke bîatkirinê ye û nikare hemû civakê hembêz bike."

Hemo hikûmeta Şamê bi valaderxistina Peymana 10ê Adarê tawanbar kir û komkujiyên li dijî gelê Elewî li herêma Beravê û êrîşên li ser Suweydayê bi bîr xistin. Herwiha reşnivîsa destûrî ya yekalî û bêbeşdarkirina Bakur û Rojhilatê Sûriyeyê ji hilbijartinan, weke delîlên vê hişmendiya dûrî demokrasiyê bi nav kir.

Sîpan Hemo tekez kir, beriya nîqaşkirina yekxistina artêşê, divê sîstema siyasî ya welat were çareserkirin û got, artêş neynika sîstema siyasî ye û divê li ser qanûnên demokratîk were avakirin.

Hemo wiha pê de çû: "Heya ku di qanûnan de guhertinên bingehîn çênebin û sîstemeke siyasî ya nenavendî ku mafê hemû pêkhateyan (Kurd, Ereb, Suryan, Ermen, Elewî, Durzî) nas dike, neyê avakirin, nîqaşkirina entegrasyona HSDê bêwate ye."

Sîpan Hemo da zanîn, HSD bi ezmûna xwe ya mezin a di şerê dijî DAIŞê û rejîma Beisê de, dikare bibe bingeha artêşeke nû û pîşeyî ji bo tevahiya Sûriyeyê û weke gaveke destpêkê pêşniyara avakirina "meclîseke leşkerî ya hevbeş" bi artêşa hikûmeta Şamê re kir, lê destnîşan kir ku pêkanîna vê yekê bi vîna siyasî ve girêdayî ye.

Li ser rola hêzên navdewletî jî Sîpan Hemo berpirsiyariya sereke xiste stûyê Hevpeymaniya Navdewletî û Amerîkayê û bang li wan kir ku ji bo gelê Sûriyeyê jî heman pîvanên demokratîk ên ku ji bo xwe dixwazin, bipejirînin.

Hemo bang li Tirkiyeyê jî kir û got: "Me weke HSD ti carî ji dewleta Tirk re gef ava nekiriye. Ger Tirkiye li Sûriyeyê aştî û aramiyê dixwaze, divê hebûna Kurdan ji bo xwe weke xeterî nebîne. Divê bawer bike ku Kurd bingeha demokratîkbûna Sûriyeyê ne."

Ev nivîs 131 car hatiye xwendin.