Mesrûr Barzanî pêşwazî li Wendy Green kir: Pêwendiyên bi Amerîka re bihêztir dibin
PeyamaKurd- Serokwezîrê Herêma Kurdistanê Mesrûr Barzanî, îro 31ê Tebaxê roja Yekşemê pêşwaziya Konsula Giştî ya nû ya Amerîkayê li Herêma Kurdistanê Wendy Green kir.
Piştî civînê hate ragihandin, di destpêka hevdîtinê de, Serokwezîr Barzanî pîrozbahî li Konsula Giştî ya nû kir û ji bo serxistina erkên wê, hemû piştgirî û piştevaniya Hikûmeta Herêma Kurdistanê anî ziman. Herwiha, Serokwezîr Barzanî spasiya Amerîkayê kir ji bo alîkarî û piştgiriya berdewam ji bo Herêma Kurdistanê di hemû waran de.
Konsula Giştî ya Amerîkayê Wendy Green jî kêfxweşiya xwe bi destpêkirina karê xwe li Herêma Kurdistanê nîşan da û bal kişand ser girîngiya pêwendiyên dostane yên di navbera her du aliyan de.
Green daxwaza welatê xwe ji bo bihêztirkirina peywendiyan ligel Herêma Kurdistanê dubare kir û mizgînî da ku di demek nêz de şandeke bazirganî ya Amerîkî dê serdana Herêmê bike.
Konsula nû ya Amerîkayê herwiha pesnê reform û çaksaziyên Hikûmeta Herêma Kurdistanê di warên cuda de da û bi taybetî girîngiya her du projeyên "Hejmara Min" û "Ronakî" anî ziman.
Di beşeke din a hevdîtinê de, tekezî li ser pêwîstiya çareserkirina kêşeyên di navbera Herêma Kurdistanê û Hikûmeta Federal a Iraqê de hate kirin.
Herwiha dabînkirina maf û şayisteyên darayî yên xelkê Kurdistanê û destpêkirina hinardekirina petrola Herêmê, mijarên din ên sereke yên gotûbêjên civînê bûn.
Ev nivîs 115 car hatiye xwendin.
