Civîna krîtîk li Bexdayê: Mûçeyên Herêma Kurdistanê di rojevê de ye
PeyamaKurd – Li Bexdayê, hevdîtinên giring ji bo çareserkirina pirsgirêka hinardekirina petrola Herêma Kurdistanê ku ji demek dirêj ve rawestiyaye, tên kirin.
Wezîrê Derve yê Iraqê, Fuad Husên, roja Yekşemê pêşwazî li Nûnerê Balyozxaneya Amerîkayê, Steven Fagin, kir û di civînê de hewlên ji nû ve destpêkirina hinardekirinê hatin gotûbêj kirin.
Li gorî daxuyaniyeke Wezareta Karên Derve ya Iraqê, di hevdîtinê de, ji bilî têkiliyên dualî yên di navbera Iraq û Amerîkayê de, bi taybetî li ser rola kompanyayên petrolê yên Amerîkî û pirsgirêkên ku li Herêma Kurdistanê rû bi rû dimînin, hat rawestîn. Her du aliyan li ser dîtina çareseriyên guncaw ji bo ku petrol cardin biherike, nîqaş kirin.
Hinardekirina petrolê ji Adara 2023yan û vir ve, piştî biryara dadgeheke hakemiyê li Parîsê, hatiye sekinandin. Dadgehê di doza ku Bexdayê li dijî Enqerê vekiribû de, biryar da ku Tirkiyeyê bi rêdana hinardekirina serbixwe ya petrola Herêma Kurdistanê, peymana boriyê ya sala 1973yan binpê kiriye.
Her çiqasî Wezareta Çavkaniyên Xwezayî ya Herêma Kurdistanê ragihandibe ku Hewlêr û Bexda li ser mekanîzmayekê ji bo destpêkirina hinardekirinê li hev kirine, lê ji bo cîbicîkirina vê yekê pêwîstî bi danûstandinên din di navbera Iraq û Tirkiyeyê de heye.
Li gorî rêkeftina nû, Herêma Kurdistanê dê rojane 50,000 bermîl ji bo pêdiviyên navxweyî veqetîne û berhema mayî dê bi rêya Saziya Bazarkirina Petrolê ya Iraqê (SOMO) were firotin. Ev lihevkirin piştî danûstandinên dirêj di navbera şandên her du aliyan de pêk hat.
Ji aliyê din ve, Wezareta Petrolê ya Iraqê di destpêka Tebaxê de soz dabû ku di berdêla kirîna rojane 230,000 bermîl petrol ji Herêma Kurdistanê, dê mûçeyên karmendên sektora giştî yên herêmê bişîne. Tevî ku hikûmeta federal 975 milyar dînar (nêzîkî 737 milyon dolar) ji bo mûçeyên meha Gulanê şand jî, ji ber sedemên teknîkî û darayî, pêkanîna vê sozê bi tevahî cîh nehatiye girtin û mûçeyên mehên Hezîran û Tîrmehê hîna nehatine dayîn.
Ev nivîs 81 car hatiye xwendin.
