Hakan Fîdan: Me bazirganiya xwe bi Îsraîlê re bi temamî qut kiriye

PeyamaKurd – Di rûniştineke awarte ya Meclîsa Tirkiyeyê de ku bi rojeva Xezeyê civiya, Wezîrê Karên Derve Hakan Fîdan pêngavên herî tund ên Tirkiyeyê yên heta niha li dijî Îsraîlê ragihand.

Fîdan di gotara xwe ya li pêşiya parlamenteran de bi awayekî eşkere diyar kir ku Tirkiyeyê biryar daye ku hemû peywendiyên xwe yên bazirganî bi Îsraîlê re bi temamî rawestîne.

Wezîr Fîdan sedemên vê biryarê aşkera kir û got, "Me bazirganiya xwe ya bi Îsraîlê re bi temamî qut kiriye." Wî da zanîn ku ev pêngav ne tenê di warê bazirganiyê de sînordar e û weha berdewam kir:

"Em êdî nahêlin keştî ji Tirkiyeyê ber bi benderên Îsraîlê ve biçin. Herweha, me qada xwe ya hewayî jî li balafirên (Îsraîlê) girtiye."

Hakan Fîdan bal kişand ser wê yekê ku helwêsta Tirkiyeyê di cîhanê de bêhempa ye û got, "Ji bilî Tirkiyeyê, tu welatekî din nîn e ku bazirganiya xwe bi Îsraîlê re bi temamî rawestandibe."

Ev daxuyaniyên tund ên Wezîrê Derve, weke guherîneke bingehîn di siyaseta derve ya Tirkiyeyê de li hemberî Îsraîlê têne nirxandin û tê payîn ku bandoreke mezin li ser peywendiyên herêmî û navneteweyî bike.

Ev nivîs 95 car hatiye xwendin.