Ji NY rapora 2025an: Li Îranê 841 kes hatin îdamkirin
PeyamaKurd- Komîseriya Bilind a Mafên Mirovan a Neteweyên Yekbûyî (NY) rapora xwe ya 2025an a îdamên li Îranê hatine kirin eşkere kir û ragihand, ji destpêka salê ve herî kêm 841 kes hatin darvekirin.
NYyê diyar kir, tenê meha Tîrmehê 100 kes hatine darvekirin; ev yek li gorî heman meha sala derbasbûyî tê wateya zêdebûna bi 2 qatî.
Di nava kesên hatin darvekirin de gelek jin, koçberên ji Afganistanê, mirovên Belûc, Kurd û Ereb hene.
Berdevka NYyê Ravina Shamdasani anî ziman ku li Îranê darvekirin weke 'amûreke tepeserkirina muxalefetê' tê bikaranîn û bi taybetî mirovên ji komên cuda yên etnîkî û koçber têne îdamkirin.
Herwiha hate ragihandin ku niha xeteriya înfazê li ser 11 girtiyan heye. Yek ji wan bi hinceta endamtiya Rêxistina Mucahîtên Gel (MEK) bi tawanbariya 'raperîna bi çekdarî', pênc jî ji ber dozên têkildarî çalakiyên şermezarkirinê yên sala 2022yan bi darvekirinê hatin mehkûmkirin.
Komîserê Bilind ê Mafên Mirovan ê Neteweyên Yekbûyî Volker Turk, careke din bang li rêveberiya Tehranê kir ku cezayên darvekirinê rawestîne û vê yekê bike gava destpêkê ya ji bo rakirina bi temamî ya cezayê darvekirinê.
Ev nivîs 89 car hatiye xwendin.
