Piştî serdana Şamê, endamên Kongresa Amerîkî êrîşa Îsraîlê şermezar kirin

PeyamaKurd – 3 endamên payebilind ên Kongresa Amerîkî ku serdana Şamê kirin, bi daxuyaniyeke hevbeş êrîşa esmanî ya roja Çarşemê ya Îsraîlê li ser Sûriyeyê bi tundî şermezar kirin.

Senatora Demokrat Jeanne Shaheen, Senatora Komarî Joni Ernst û Endamê Meclisa Nûneran ê Komarî Joe Wilson, duh, roja Pêncşemê daxuyaniyek weşandin û diyar kirin ku ev êrîş hewlên aştiyê yên li herêmê têk dide. Di daxuyaniya hevbeş de weha hat gotin:

"Em nû ji Sûriyeyê vegeriyan. Li wir, me rasterast bi Serokê demkî Ehmed Şera, wezîrên kabîneyê û Sûriyeyiyên ji hemû pêkhateyan re hevdîtin kir. Peyam zelal bû: Pêdiviya Sûriyeyê bi derfetekê heye da ku tundûtûjiya zêdeyî 14 salan li dû xwe bihêle. Êrîşên hewayî yên bêîstîqrar ên Îsraîlê gihîştina vê armancê dijwartir dike."

Endamên Kongresê di daxuyaniya xwe de amaje bi gavên dîplomatîk ên berê kirin, tevî biryara Trump a ji bo rakirina dorpêçan û hevdîtina dîrokî ya di navbera hikûmetên demkî ya Sûriyeyê û Îsraîlê de ku vê mehê li Parîsê bi navbeynkariya Nûnerê Taybet Tom Barrack pêk hatibû.

Daxuyaniya ku li ser malpera Komîteya Têkiliyên Derve ya Senatoyê hat weşandin, bang li Îsraîlê kir ku "tavilê dijminatiyê rawestîne" da ku rê li ber pêşketina pêvajoya aştiyê vebe. Herweha hat tekezkirin ku Sûriyeyeke aram "yekane rê ye ji bo rizgarkirina ji bandora Îranê û kontrolkirina gefa DAIŞê."

Ev nivîs 112 car hatiye xwendin.