Îdîa: Serokwezîrê Hûsiyan di êrîşeke Îsraîlê de li Senayê hat kuştin

PeyamaKurd –  Medyaya opozîsyona Yemenê îro ragihand ku Serokwezîrê Hûsiyan, Ehmed El Rehawî, di encama êrîşeke esmanî ya Îsraîlê de li paytext Senayêhatiye kuştin.

Televîzyona El-Cumhuriyeyê ya ku navenda wê li Edenê ye, diyar kir ku El Rehawî roja Pêncşemê li navçeya Beyt Bawsê ya li başûrê Senayê hatiye hedefgirtin. Rojnameya Aden el-Ghadê jî da zanîn ku di heman êrîşê de gelek kesên nêzîkî El Rehawiyê jî hatine kuştin.

Ji aliyê xwe ve, Artêşa Îsraîlê piştrast kir ku hêzên wan "tesîseke leşkerî ya rejîma Hûsî" li Senayê kirine armanc. Li gorî daxuyaniya Îsraîlê, operasyon bi hevrêziya Serokwezîr Benjamîn Netanyahû û Wezîrê Parastinê Israel Katz hatiye lidarxistin.

Çavkaniyên herêmî destnîşan dikin ku armanca êrîşê civîneke payebilind a wezîr û fermandarên leşkerî yên Hûsiyan bû. Îsraîl îdia dike ku îhtîmal heye Wezîrê Parastinê û Serfermandarê Giştî yê Hûsiyan jî di nav kuştiyan de bin, lê serokê Hûsiyan Ebdulmelîk El Hûsî di dema êrîşê de ne li cihê bûyerê bû.

Piştî operasyonê, Wezîrê Parastinê yê Îsraîlê, Israel Katz, daxuyaniyek da û got, "Weke ku me li Yemenê hişyarî da Hûsiyan: Yên ku destên xwe li dijî Îsraîlê rakin, dê destên wan bên jêkirin."

Ev nivîs 48 car hatiye xwendin.