Silêmanî | Helîkopter di operasyona rizgarkirinê de ket xwarê
PeyamaKurd – Li Çiyayê Ezmerê yê Silêmaniyê, operasyoneke rizgarkirinê bi karesatekê bi dawî bû. Helîkoptereke ku ji bo wergirtina termê welatiyekî ku di qezayeke trafîkê de canê xwe ji dest dabû hatibû şandin, ket xwarê.
Bûyer îro piştî nîvro dest pê kir, dema ku wesayîtek ji ber sedemek ku hêj nehatiye zanîn, li Çiyayê Ezmerê ji kontrolê derket û wergeriya. Di encama qezaya giran de ajokarê wesayîtê li cihê bûyerê canê xwe ji dest da. Li ser agahdarkirinê, helîkoptereke rizgarkirinê ji bo rakirina cendekê ajokar hate şandin. Lêbelê, ji ber zehmetî û asêbûna erda çiyayî, pîlotê helîkopterê kontrola xwe winda kir û helîkopter li nêzî cihê qezaya yekem ket xwarê.
Di encama ketina helîkopterê de, du kesên di nav de birîndar bûn. Tîmên tenduristiyê û rizgarkirinê yên ku demildest gihîştin herêmê, midaxeleya yekem li birîndaran kirin û ew rakirin nexweşxaneyê. Derbarê her du bûyerên li pey hev de, rayedaran lêpirsîneke berfireh dane destpêkirin da ku sedemên qezayan ronî bikin.
Ev nivîs 95 car hatiye xwendin.
