Li Nîgdeyê êrîşî karkerên demsalî yên Kurd hat kirin

PeyamaKurd – Parlamentera Partiya Wekhevî û Demokrasiyê ya Gelan (DEM Partî) ya Batmanê, Zeynep Odûncû Kûteviyê ragihand ku li navçeya Borê ya bajarê Tirkiyeyê Nîgdeyê êrîşeke nijadperestî li dijî karkerên demsalî yên Kurd pêk hatiye.

Li gorî agahiyên ku Kûteviyê belav kirin, komek karkerên ji navçeya Sêweregê ya Rihayê ku ji bo xebatê çûne Nîgdeyê, rastî êrîşê hatin.

Piştî bûyerê, karkerên ku birîndar bûn, rakirin Nexweşxaneya Perwerde û Lêkolînê ya Nîgdeyê.

Kûteviyê dîmenên êrîşê li ser hesabê xwe yê medyaya civakî weşand û di daxuyaniya xwe de ev tişt anî ziman:

"Careke din, êrîşeke faşîst li dijî welatiyên me yên ku wekî karkerên demsalî çûne Nîgdeyê, hatiye kirin. Ev êrîş nîşan dide ku ewlehiya canê welatiyên me nehatiye misogerkirin."

Parlamentera DEM Partiyê daxwaz kir ku berpirsiyarên êrîşê demildest werin tesbîtkirin û hesab ji wan were pirsîn. Herweha, wê bang li Wezareta Karên Navxwe ya Tirkiyeyê û hemû saziyên pêwendîdar kir ku ji bo parastina ewlehiya karkeran bikevin nava liv û tevgerê.

Heta niha derbarê bûyerê de ji aliyê Parêzgariya Nîgdeyê û Wezareta Karên Navxwe ve tu daxuyaniyeke fermî nehatiye dayîn.

Ev nivîs 82 car hatiye xwendin.