Berdevkê AKPê Çelik: Biryara PKKê ji bo armanca 'Tirkiyeya bê teror' gaveke gring e

PeyamaKurd - 

Berdevkê Partiya Dad û Hilberînê (AKP) Omer Çelik got: "Piştî banga ji Îmraliyê, biryara PKKê ya xwe feshkirin û destjêberdana çekan, di warê armanca 'Tirkiyeya bêteror' de gaveke gring e."

Piştî ku Partiya Karkerên Kurdistanê, li ser banga Serokê xwe Abdulah Ocalan 12mîn Kongreya xwe pêk anî û biryara xwefeshkirin û destjêberdana çekan ragihand, ji AKPê yekem nirxandin ji berdevkê partiyê Omer Çelik hat.

Çelik di ragihandina xwe de got: "Danûstandin, şêwirmendî û diyaloga bi bandor û berhemdar di navbera partiyên siyasî de misoger dike ku siyaseta demokratîk berpirsiyariyê digire ser xwe û wekî 'navnîşanek rewa' înîsiyatîfan derdixe holê."

Çelik, di derbarê siberoja pêvajoyê de jî axaftina xwe wiha dom kir: "Divê ev biryar di pratîkê de were bicîhanîn û di hemî aliyên xwe de were pêkanîn. Bicîhanîna berbiçav û bêkêmasî ya biryara 'rawestandin' û 'teslîmkirina çekan', ku dê hemî şax û şaxên PKK û avahiyên wê yên neqanûnî bigire, dê xalek werçerxê be."

Berdevkê AKPê tekez kir ku "ev pêvajo wê ji aliyê saziyên dewletê ve li qadê bi baldarî were şopandin û qonaxên hatine bidestxistin wê ji Serokkomar Recep Tayyip Erdogan re werin pêşkêş kirin."

Çelik destnîşan kir ku biryara jiholêrakirin û bêçekkirina PKKê, divê hem ji hundir û hem jî ji derve ve, bi awayekî berbiçav di hemû aliyên wê de were bicîhanîn û wiha dom kir:

“Bi vî awayî, li herêma me ya nêzîk, wê pêleke erênî bihê afirandin da ku pêşî li planên emperyalîst ên ku rêxistinên terorîst ji bo şerên wekaletê bikar tînin were girtin."

Piştî Omer Çelik, Cîgirê Serokê AKPê Efkan Ala jî got, "Di vê qonaxa girîng de, mekanîzmayên derbarê karê ku were kirin û birêvebirina pêvajoyê de wê li gorî pêwîstiyê werin xebitandin."

Efkan Ala li ser hesabê xwe yê medyaya civakî daxuyaniyek da û got, "Di vê qonaxa gring de, mekanîzmayên têkildarî karê ku divê bêne kirin û birêvebirina pêvajoyê, wê li gorî pêdiviyan bêne xebitandin. Em bi biryardarî ber bi armanca Tirkiyeyek Bêteror ve diçin ku Serokkomarê me Recep Tayyip Erdogan û Devlet Bahçeli bi îrade û aqilmendiya xwe danîne holê."

Bakirhan: Bila Kongre ji bo Tirkiyeyê pîroz be

Hevserokê DEM Partiyê Tuncer Bakirhan jî di daxuyaniya xwe ya çapemeniyê de got, "Bila kongre ji bo Tirkiyeyê pîroz be. Êdî ti astengiyek li pêş avakirina Tirkiyeyeke demokratîk û çareserkirina pirsgirêka Kurd tune ye. Ez hêvî dikim ku em vê pêvajoyê bi aştiyê tacîdar bikin."

Endama şanda Îmraliyê û parlamentera DEM Partiyê Pervîn Buldan jî di heman daxuyaniya çapemeniyê de, di derbarê biryara PKKê de got:

"Îro atmosferek ku bi salan e tê ceribandin lê ti encamek nedaye hatiye girtin ku em dikarin bi hêviyê hembêz bikin. Serdemeke nû dest pê kiriye ku em ê têlên dirandî rakin û aştiyê tacîdar bikin. Xwezî Sirri Sureya Onder jî van rojan bidîta. Bila ew ji bo me bereket be."

Biryara PKKê

PKKê ku li ser banga Abdullah Öcalan di 5-7ê Gulanê de kongreya xwe li dar xist, ragihand ku rêxistin hatiye hilweşandin.

PKKê ragihand ku wan avahiya xwe ya rêxistinî "bi pêvajoya bicihanîna wê ya ku ji hêla Abdullah Öcalan ve were birêvebirin û meşandin" hilweşandiye û rêbaza têkoşîna çekdarî û xebatên ku di bin navê PKKê de dihatin meşandin bi dawî kiriye.

PKKê bang li "hêzên navneteweyî" jî kir ku rê li ber çareseriya demokratîk negirin û beşdariyeke avaker bikin.

Ev nivîs 36 car hatiye xwendin.