Nûnerê Amerîkayê yê Sûriyeyê û Mezlûm Ebdî dê bicivin

PeyamaKurd – Tê payîn ku Nûnerê Amerîkayê yê Sûriyeyê Thomas Barack û Fermandarê Giştî yê Hêzên Sûriyeya Demokratîk (HSD) Mazlûm Ebdî di rojên pêş de bicivin û li ser şerê li dijî DAIŞê, pêkanîna peymana Adarê û têkiliyên bi Tirkiyeyê re biaxivin.

Tê payîn ku nûnerê Amerîkayê li Sûriyê Thomas Barack di rojên pêş de bi Fermandarê Giştî yê Hêzên Sûriyeya Demokratîk (HSD) Mezlûm Ebdî re bicive. Armanca civînê berdewamiya hevkariyê û avêtina gavên nû di navbera hevpeymaniya navneteweyî ya bi pêşengiya Amerîkayê û HSDyê de ye di şerê li dijî DAIŞê de li Sûriye û Iraqê. 

Di rojeva civînê de çi heye?

Her çend rayedarên HSDyê derbarê dem û cihê civîna di navbera Barak û Ebdî de daxuyaniyeke fermî nedaye jî, çavkaniyên nêzîkî HSDyê ragihandin ku tê plankirin ku civîn di nav çend rojan an hefteyekê de pêk were. Tê diyarkirin ku nûnerê Amerîkî dê bi Mezlûm Ebdî re li ser pêkanîna peymana ku di meha Adarê de di navbera Ebdî û Serokatiya Sûriyeyê de hatiye îmzekirin, nîqaş bike.

Her wiha tê ragihandin ku çêdibe ku Barack, Ebdî û Serokkomarê Demkî yê Sûriyeyê Ehmed Şera teşwîq bike ku peymana heyî nû bikin an jî bi piştgiriya Fransayê peymaneke nû çêkin.

Mijarên din ên di rojeva civînê de

Herdu alî dê li ser berdewamiya hevkariya di navbera hevpeymaniya navneteweyî û HSDyê de, pêşketinên dawî yên di şerê li dijî DAIŞê de û têkiliyên bi Tirkiyeyê re jî nîqaş bikin.

Li gorî çavkaniyên nêzîkî HSDyê, Barak vê dawiyê di pêwendiyeke telefonî de bi Ebdî re nîgeraniya xwe anî ziman ku ewlehiyê ya li Sûriyeyê dibe ku ji ber çalakiyên dawî yên DAIŞê hilweşe.

Civîn dê li ku derê pêk bê?

Cihê civînê hîn nehatiye piştrastkirin, lê çavkanî dibêjin ku îhtîmal e ku ew li paytexta Herêma Kurdistanê, Hewlêrê, pêk were. Mazlûm Ebdî berê li Hewlêrê bi Serok Barzanî re hevdîtin kirib û di meha Nîsanê ya borî de li wir bi Wezîrê Derve yê Fransayê Jean-Noël Barrot re civiyabû.

Her wiha tê payîn ku Barack serdana baregehên hevpeymaniya navneteweyî li Rojavayê Kurdistanê jî bike.

Ev nivîs 110 car hatiye xwendin.