PDK-Î: Rejîma Îranê berpirsiyara krîza niha ye
PeyamaKurd – Partiya Demokrat a Kurdistana Îranê (PDK-Î) bi daxuyaniyeke fermî êrîşên Îsraîlê yên ji 13ê Hezîrana 2025an li ser tesîsên leşkerî û nukleerî yên Îranê nirxand û rejîma Komara Îslamî ya Îranê wekî berpirsiyara krîza niha bi nav kir.
Li gorî daxuyaniya Komîteya Rêvebiriya PDK-Îyê, êrîşên Îsraîlê, ku di encamê de gelek zanyarên nukleerî û fermandarên payebilind ên Pasdarên Şoreşê (IRGC) û hêzên çekdar ên rejîmê hatin kuştin, encama polîtîkayên "dijminane" û "krîz-çêker" ên rejîma Îranê ne.
PDK-Îyê di daxuyaniya xwe destnîşan kir ku rejîm bi awayekî sîstematîk ewlehiya herêmî û cîhanî xirab kiriye, peymanên navneteweyî binpê kirine û jiyana welatiyên Îranê wekî amûrekê ji bo armancên xwe yên îdeolojîk bi kar aniye.
PDK-Îyê diyar kir ku rejîma Îslamî zêdetirî 40 salan e bi awayekî bêperwa hemû çavkanî xerc kirine, gelê Rojhilatê Kurdistanê û Îranê di nav krîzên siyasî, civakî û mirovî de hiştiye, û bi rêya terorê, kuştina rêberên opozîsyonê, binpêkirina mafên mirovan û wêrankirina aborî û jîngehê desthilatdariya xwe domandiye.
Partiyê tekez kir ku gelê Îranê bi rêya boykotên hilbijartinan, grevan, û tevgerên wekî “Jin, Jiyan, Azadî” bi zelalî nîşan daye ku rejîm ne xwedî tu meşrûiyeta siyasî an civakî ye.
Di daxuyaniyê de, PDK-Îyê bang kir ku ji bo rizgarkirina welatiyên Îranê ji vê “krîz, wêranî û tarîtiyê”, gava yekem û ya herî giring jiholêrakirina bi temamî ya rejîma Komara Îslamî ye.
Partiyê hişyarî da ku heta ku rejîm li ser desthilatê be, rewşa welat wê tenê xirabtir bibe.
Ev nivîs 91 car hatiye xwendin.
