Di navbera Tirkiye û Sûriyê de peymaneke berfireh a leşkerî hate îmze kirin
PeyamaKurd- Wezaretên Berevaniyê yên Tirkiye û Sûriyeyê ji bo xurtkirin û nûjenkirina artêşa Sûriyeyê, peymaneke berfireh a hevkariya leşkerî îmze kirin.
Ajansa fermî ya Sûriyeyê SANAyê ragihand ku armanca peymanê kapasîteyên Artêşa Ereb a Sûriyeyê zêde bike, saziyên wê nûjen bike û piştgirîyê bide proseya reformên di sektora ewlehiyê de.
Peyman ji van xalan pêk tê:
* Pevguhertina personelên leşkerî: Ji bo zêdekirina amadebaşiya operasyonê û pêşxistina karîna xebata hevpar, personel dê bi awayekî rêkûpêk bên guhertin û beşdarî perwerdeyên taybet bibin.
* Bernameyên perwerdehiya pisporî: Li qadên wekî têkoşîna li dijî terorê, paqijkirina mayînan, berevaniya sîber, endezyariya leşkerî, lojîstîk û operasyonên parastina aştiyê, perwerdeyên li gorî pîvanên navneteweyî dê bên lidarxistin.
* Alîkariya teknîkî: Ji bo nûjenkirina sîstemên leşkerî, avahiyên rêxistinî û kapasîteyên fermandariyê, piştgirîya personelên pispor dê bê dayîn.
Rayedaran diyar kiriye ku peyman dê alîkariyê bide ku personelên Artêşa Ereb a Sûriyeyê li gorî pîvanên navneteweyî perwerdehiyeke profesyonel bibînin û bi vî awayî armanc ew e ku rîska binpêkirinên komên bêperwerde kêm bibe.
Ev nivîs 112 car hatiye xwendin.
