Nepal | Piştî 19 kesan can da û serokwezîr îstifa kir, artêş daket kolanan
PeyamaKurd – Li paytexta Nepalê, Katmanduyê, û bajarên din ên welêt, aloziyeke mezin rû daye. Piştî xwepêşandanên tund ên li dijî qedexeya medyaya civakî ku tê de 19 kesan canê xwe ji dest da û bû sedema îstifaya serokwezîr, artêş daket kolanan û qedexeya derketina derve berdewam e.
Sedema Pevçûnan: Qedexeya Medyaya Civakî
Sedema pevçûnan: Qedexeya medyaya civakî
Tevgerên protestoyî hefteya borî dest pê kirin, dema ku hikûmetê di 4ê Îlonê de gihîştina platformên wekî Facebook, X (Twitter), Instagram û YouTube bi hinceta ku qeydên xwe yên fermî nû nekirine, asteng kir. Li ser vê biryarê, bi hezaran xwepêşanderên ku piraniya wan ciwan bûn, li dijî hikûmetê û îdiayên gendeliyê daketin qadan.
Tundûtîjiya berbelav û encamên giran
Xwepêşandanên ku bi awayekî aştiyane dest pê kiribûn, zû vegeriyan tundûtûjiyê. Polîsan bi gaza rondikrêj, topên avê û guleyên rastîn bersiv da girseyê. Di encama pevçûnan de, herî kêm 19 kes hatin kuştin û zêdetirî 400 kes jî birîndar bûn.
Tevî ku hikûmetê paşê qedexe rakir û Serokwezîr Khadga Prasad Sharma Oli û çend wezîrên payebilind îstifa kirin jî hêrsa gel nesekinî û xwepêşandan berfirehtir bûn. Xwepêşanderan gelek avahiyên hikûmetê, di nav de baregeha Partiya Kongreya Nepalê, avahiya parlamentoyê, Dadgeha Bilind û du xaniyên serokwezîr Oli, şewitandin. Herweha êrîşî avahiya saziya medyayê ya Kantipurê kirin û pêşkeşker (server) wê têk birin.
Rewş hîn zêdetir aloz bû dema ku zêdetirî 1000 girtî ji du girtîgehên cuda reviyan û agir berdan girtîgehan.
Artêş hat seferberkirin û banga navneteweyî
Ji ber vê kaosa berbelav, hikûmetê li gelek herêman qedexeya derketina derve ragihand û artêş li kolanên paytext Katmanduyê hate bicihkirin da ku ewlehiyê pêk bîne. Artêşê ragihand ku 27 kes bi tometa "talankirinê" hatine girtin.
Li hemberî van geşedanan, Sekreterê Giştî yê Neteweyên Yekbûyî (NY) Antonio Guterres daxuyaniyek da û xemgîniya xwe ji ber kuştina sivîlan anî ziman. Guterres bang li hemû aliyan kir ku xwe ragirin, diyalogê ava bikin û rêzê li mafên mirovan bigirin.
Ev nivîs 84 car hatiye xwendin.
