Amerîka û Venezuela: Trump bi fermî destûr da operasyonên veşartî yên CIAyê
PeyamaKurd – Serokê Amerîkayê Donald Trump piştrast kir ku wî destûr daye Ajansa Îstixbarata Navendî (CIA) da ku li Venezuelayê operasyonên veşartî pêk bîne, bi hinceta têkoşîna li dijî kartelên narkotîkê. Ev pêngav aloziya ku jixwe di navbera Washington û Caracasê de di asta herî bilind de ye, kûrtir dike.
Ev yek di demekê de tê ku di hefteyên dawî de, hêzên Amerîkî herî kêm 5 caran êrîşî keştiyên bi guman li Deryaya Karayîbê kirine û di encamê de 27 kes kuştine. Pisporên mafên mirovan ên Neteweyên Yekbûyî van êrîşan weke "kuştinên derveyî dadgehê" bi nav dikin.
Trump: Min ji ber du sedeman destûr da
Di axaftineke xwe de li Qesra Spî, Trump bi awayekî eşkere ku di siyaseta Amerîkî de kêm tê dîtin, li xwe mikur hat ku destûr daye operasyonên ajanseke sîxuriyê û got:
"Min ji ber du sedeman destûr da vê yekê. Ya yekem, wan [Venezuela] girtîgehên xwe vala kirin û girtî şandin Dewletên Yekbûyî. Ya duyem jî madeyên hişbir in. Gelek madeyên hişbir ji Venezuelayê tên."
Trump her weha îşaret pê da ku Amerîka "vebijêrka desttêwerdaneke bejayî jî dinirxîne" û bi vî awayî gefên li ser hikûmeta Serok Nicolas Maduro zêde kirin.
Venezuelayê bersiv da: Em ê welatê xwe biparêzin
Li hemberî van gefan, Serokê Venezuelayê Nicolas Maduro bersiv da û ferman da destpêkirina tetbîqatên leşkerî li paytext Caracasê û derdora wê. Maduro Amerîka bi plansazkirina "darbeyeke ji bo guhertina rejîmê" tawanbar kir.
Cîgira Serokê Venezuelayê, Delcy Rodriguez, bi zimanekî tund axivî û got:
"Bila tu êrîşkar newêribe êrîş bike, ji ber ku divê bizanibin li vir gelê Simón Bolívar heye, ku dê şûrên xwe bilind bike da ku di her şert û mercî de me biparêze."
Ev daxuyaniyên Trump di demekê de ne ku Amerîka zextên xwe yên leşkerî li herêmê zêde kirine û heşt keştiyên şer, keştiyeke binavê ya bi enerjiya nukleerî û balafirên şer şandine Karayîbê.
Rêveberiya Trump a ku Nicolas Maduro weke serokê rewa nas nake, wî bi serkêşiya rêxistineke bazirganiya narkotîkê ya bi navê "Kartela Rojê" (Sun Cartel) tawanbar dike û 50 milyon dolar xelat jî ji bo girtina wî daniye. Maduro van hemû tohmetan red dike û Amerîka bi hewldana desteserkirina serwetên petrolê yên welatê xwe tawanbar dike.
Ev nivîs 82 car hatiye xwendin.
