Arakçi: "Plana Îsraîla Mezin herêmê tehdît dike"
PeyamaKurd - Wezîrê Derve yê Îranê Abbas Arakçi, di civîna awarte ya Rêxistina Hevkariya Îslamî (OIC) de li Astanayê axivî û nêrînên Îranê yên li ser pêşketinên li Filistînê û kiryarên Îsraîlê eşkere kir.
Arakçi vîzyona "Îsraîla Mezin" wekî gefek rastîn li ser aştî û ewlehiya navneteweyî bi nav kir.
Li gorî Wezîrê Derve yê Îranê, kiryarên Îsraîlê ne tenê bi sînorê Xezzeyê ve sînordar in. Berfirehkirina wargehên li Şerîaya Rojava, bicihkirina hejmareke mezin ji Cihûyan li Orşelîmê, êrîşên dubare yên li ser Lubnan û Sûriyeyê û hewldanên ji bo parçekirina welatan hemî hûrguliyên plana mezin a Îsraîlê ne.
Arakçi destnîşan kir ku daxuyaniyên rayedarên Îsraîlê û nexşeyên weşandî yên derbarê "Rojhilata Navîn a Mezin" de bi zelalî siyasetek berfirehker ji Nîlê heta Firatê îlan dikin ku serwerî û yekparçeyiya axa welatên wekî Sûriye, Urdun, Misir, Lubnan, Kuweyt, Iraq û Erebistana Siûdî tehdît dike.
Wezîr Arakçi piştgiriya ku hêzên rojavayî, bi taybetî DYA, didin Îsraîlê û vetokirina berdewam a biryarên Konseya Ewlekariyê rexne kir û diyar kir ku ev piştgirî sûcek hevpar û gefek li ser aştiya cîhanê ye.
Wezîrê Derve yê Îranê ji bo rawestandina êrîşê, sepandina zexta siyasî û dîplomatîk, darizandina serokên Îsraîlê li dadgehên navneteweyî û sepandina mueyîdeyên leşkerî û aborî yên berfireh daxwaza koalîsyonek herêmî û cîhanî kir.
