Rûsya: Me piraniya erdên du herêmên Ukraynayê kontrol kir

PeyamaKurd- Sererkanê Artêşa Rûsyayê Valeri Gerasimov ragihand, xebatên ji bo avakirina herêmeke tampon a li ser sînorê Ukraynayê li gel herêmên Sumî û Xarkivê bi serkeftî didomin û diyar kir ku ji bo kontrolkirina hemû herêma Luhanskê kêmtirî 60 kîlometreçargoşeyî maye.

Gerasimov got ku hêzên Rûsyayê heta niha ji sedî 99,7ê axa Luhanskê û ji sedî 79ê herêma Donetskê kontrol kirine û wiha pê de çû: "Hêzên me yên hevbeş, hema hema li ser hemû xetên eniyê bêrawestan êrişên xwe didomînin. Ji meha adarê ve zêdetirî 3 hezar û 500 kîlometreçargoşe û 149 wargeh hatine rizgarkirin. Hêzên li herêma Dnîpropetrovskê bi pê şve çûne û 7 war kontrol kirine. Vê gavê, hêzên me yên çekdar ji sedî 99,7ê axa Komara Gel a Luhanskê û ji sedî 79ê axa Komara Gel a Donetskê kontrol dikin. Herwiha ji sedî 74ê herêma Zaporîjyayê û ji sedî 76ê herêma Xersonê di bin kontrola hêzên Rûsyayê de ne.”

Gerasimov da zanîn, “Piştî ku me dijmin têk bir û rê li ber ketina wan a nav axa herêma Kurskê girt, hêzên koma Bakur erka avakirina herêmeke ewlehiyê bi cih tînin. Niha li herêma Sumiyê 210 kîlometreçargoşe û 13 war di bin kontrola hêzên me de ne."

Gerasîmov diyar kir ku bajarê Kupyanskê hema hema bi temamî hatiye dorpêçkirin û nîvê bajêr ketiye bin kontrolê.

Wezareta Parastinê ya Rûsyayê jî roja şemiyê ragihandibû ku hêzên wan li aliyê Rubtsovskoyê 25 kîlometreyan bi pêş ve çûne û 10 cih kontrol kirine û hêzên wan bajarokê Kamîşevaxayê yê Donetskê kontrol kiriye û hêzên Ukraynayê ziyanên mezin dîtine.

Ev nivîs 79 car hatiye xwendin.