Li Misrê trên qeza kir: 3 kes mirin û 94 kes birîndar bûn

PeyamaKurd – Li welatê Misrê trêna ku sefera Qahîre û Marsa Matruhê dikir ji ser rêya hesin derket û qeza kir. Piştî qezayê 3 kes mirin û 94 kes jî birîndar bûn. Qeza nêzî bajarê El-Dabaayê, di navbera gundên El-Ferdiye û Zaviye el Awama de çêbû.

Wezareta tenduristiyê ya Misrê ragihand ku di qezayê de 3 kes mirine û 94 kes birîndar bûne. Li aliyê dinê dezga rêyên hesin ya Misrê ragihand ku trêna sefera Qahire-Marsa Matruhê dikir 7 vagonên wê hebûn û 2 vagonên wê ji ser rêya hesin derketine û wergeriyane. Ji bo rakirina enqazan pêdiviyên hene şandine ciyê bûyerê.

Di daxwuyaniyê de hat gotin ku 55 birîndaran şandine nexweşxana navendê ya bajarê El-Dabaa û 39 birîndaran jî şandine nexweşxana Ras El-Hikmayê.

Ev nivîs 104 car hatiye xwendin.