Serokê berê yê parlamentoya Ûkraynayê hat kuştin

PeyamaKurd – Serokê berê yê Parlamentoya Ûkraynayê (Verkhovna Rada) û yek ji navên herî nas ên xwepêşandanên Meydanê, Andrî Parûbî, îro li bajarê Livîvê di encama êrîşeke çekdarî de hat kuştin. Kuştina Parubî, ku di temenê 54 salî de bû, li seranserê welêt şokek mezin durist kir.

Bûyer îro danê nîvro li navçeya Frankîvskiyê ya Livîvê qewimî. Li gorî daxuyaniya polîsan, Parubî di cihê bûyerê de canê xwe ji dest daye. Parlamentera Partiya "Hevgirtina Ewropî", Îrîna Heraşçenkoyê, nasnameya qurbanî wek Andrî Parubî piştrast kir.

Zelenskî: Kuştineke hovane ye

Serokkomarê Ûkraynayê Volodîmîr Zelenskî bûyer wek "kuştineke hovane" bi nav kir û ragihand ku wî hemû dezgehên ewlehiyê ji bo dîtina kujer seferber kirine. Zelenskî got, "Min agahiyên destpêkê yên derbarê kuştina hovane ya li Livîvê wergirtin. Andrî Parûbî jiyana xwe ji dest da. Hemû hêz ji bo dîtina kujer hatine erkdarkirin."

Êrîşkar xwe wek kûrye nîşan daye 

Her çend hîn bi awayekî fermî motîvasyona êrîşê nehatibe eşkerekirin jî, medyaya Ûkraynayê li ser zarê çavkaniyên ewlehiyê ragihand ku êrîşkar xwe wekî kuryeyekê nîşan daye. Hat ragihandin ku êrîşkar bi bîsîkleteke elektrîkî nêzîkî Parûbî bûye, gule lê reşandiye û piştre ji cihê bûyerê reviyaye. Li gorî zanyariyan, li cihê bûyerê heft fîşekên vala hatine dîtin.

Waliyê Herêma Livîvê, Maksîm Kozîtskî, da zanîn ku operasyonên ji bo girtina bersûc bi awayekî berfireh didomin.

Andrî Parûbî kî bû? 

Andrî Parûbiyê ku bi helwêstên xwe yên tund ên li dijî Rûsyayê dihat naskirin, kesayetiyekî girîng bû di siyaseta nûjen a Ûkraynayê de. Ew yek ji rêberên sereke yên Şoreşa Porteqalî (2004) û Xwepêşandanên Meydanê (2013-2014) bû ku di encamê de serokkomarê alîgirê Rûsyayê Vîktor Yanûkovîç ji desthilatê ket.

Piştî şoreşê, Parûbî di navbera Sibat û Tebaxa 2014an de wek Sekreterê Encumena Ewlekarî û Berevaniya Neteweyî kar kir. Di vê heyamê de, Rûsyayê Kirim îlhaq kir û şer li Donbasê dest pê kir.

Parûbî ji sala 2016an heta 2019an serokatiya parlamentoya Ûkraynayê kir û ji sala 2019an û vir ve wek parlamenterê partiya Serokkomarê berê Petro Poroşenko, "Hevgirtina Ewropî", karê xwe didomand.

Ev nivîs 116 car hatiye xwendin.