Pasdarên Şoreşa Îranê gef li Amerîkayê xwar: Wê poşman bibin!
PeyamaKurd – Muhafizên Şoreşê yên Îranê êrîşa danê sibê ya Amerîkayê bo ser tesîsên navokî yên Îranê şermezar kir û ew wek "êrîşeke eşkere û bêmînak" wesif kir. Di daxuyaniyê de hat gotin ku ev êrîş "bêçaretiya DYA û Îsraîlê eşkere dike."
Daxuyaniya Muhafizên Şoreşa Îranê bal kişand ser rola hêzên Amerîkayê di vê êrîşê de û got: "Piştgirî û hevahengiya rasterast a Amerîkayê di her astê de di pêkanîna vê êrîşê de bi bandor bû."
Di berdewamiya daxuyaniyê de agahî hatin parvekirin ku xalên ku êrîş lê pêk hatin, "bi rêya vekolînên îstixbaratê pêşwext hatibûn diyarkirin û niha di bin çavan de ne." Hat diyarkirin ku hêzên Îranê xalên derketinê yên yekîneyên hewayî yên beşdarî êrîşê bûne diyar kirine.
Di beşa bernameya nukleerî ya Îranê de ev daxuyanî hatin dayîn:
Teknolojiya nukleerî ya aştiyane ya Komara Îslamî bi ti êrîşan nayê rawestandin, berevajî vê, êrîşên bi vî rengî îradeya zanistî û îradeya nifşa me ya ciwan ji bo pêşkeftinê zêdetir xurt dike.
Herwiha, Muhafizên Şoreşê ragihand ku êrîşên armanckirî û bi bandor ên li ser navendên stratejîk ên Îsraîlê dê di çarçoveya "Operasyona Soza Rast-3" ya ku berê dabû destpêkirin û berdewam kiribû de, berdewam bikin. Di daxuyaniyê de hat ragihandin ku di çarçoveya vê operasyonê de nêzî 20 xalên bilind ên Îsraîlê hatine xistin.
Muhafizên Şoreşa Îranê hişyarî da û got: “Pêdivî ye ku berpirsên êrîşê rastî bersiveke tund û poşman bibin.”
