Mersûmî: Ji bo hinardekirina petrolê divê pirsgirêkên Bexda-Hewlêr werin çareserkirin

PeyamaKurd – Pisporê navdar ê aborî yê Iraqê, Nebîl Mersûmî, bang kir ku divê bi lezgînî kar ji bo çareserkirina pirsgirêkên di navbera hikûmeta federal a Bexdayê û hikûmeta Herêma Kurdistanê de were kirin, da ku rê li ber jinûvedestpêkirina hinardekirina petrola Herêma Kurdistanê û Kerkûkê were vekirin.

Mersûmî di daxuyaniyekê de li ser rûpela xwe ya fermî ya Facebookê amaje bi daneyên OPECê kir û diyar kir ku Iraqê di meha Tebaxê de rojane 3 milyon û 458 hezar bermîl petrol bi rêya deryayê hinartiye, ku ev hejmar nêzîkî 3.5 milyon bermîlan e.

Wî tekez kir ku ji bo Iraq bikare rêjeya hinardekirina xwe bilind bike, pêwîst e ku li gel Tirkiyeyê bigihîje lihevkirinê da ku xeta boriyê ya bendera Ceyhanê jinûve bikeve kar. Mersûmî got, "Ji bo ku ev yek pêk were, divê bi lez û bez pirsgirêkên navbera Bexda û Hewlêrê werin çareserkirin."

Li gorî pisporê aborî, vekirina xeta Ceyhanê dê derfetê bide ku rojane nêzîkî nîv milyon bermîl petrola Herêma Kurdistanê û Kerkûkê were hinardekirin. Wî di dawiya daxuyaniya xwe de anî ziman, "Ev pêngav dê roleke giring di kêmkirina kêmasiya darayî û kêşeya budceyê de bilîze, ku Iraq niha bi giranî di bin bandora wê de ye."

Ev nivîs 104 car hatiye xwendin.