DNOyê piştî êrîşên dronan hilberîna petrolê ji nû ve da destpêkirin

PeyamaKurd- Kompanyaya Norwêcî ya petrol û gazê DNO ragihand ku piştî rawestandina bi hefteyan a li pey êrîşên di dronan di meha Tîrmehê de, wan li zeviyên petrolê yên Herêma Kurdistanê ji nû ve dest bi berhemanînê kiriye. Herwiha DNO plan dike ku asta berhemanînê di demeke nêz de vegere asta xwe ya beriya êrişan.

Kompanyaya DNO îro 21ê Tebaxa 2025an bi daxuyaniyekê eşkere kir, ev pêngav piştî wê yekê tê ku karê wan ji ber çend êrîşên bi dronan li ser zeviyên petrolê yên Tawke û Pêşxabûrê hatibû rawestandin.

Hate diyarkirin, berhemanîn di qonaxa testê de gihîştiye 55 hezar bermîlên petrolê di rojekê de, ku nîvê wê ji zeviya Tawke û nîvê din jî ji Pêşxabûrê tê derxistin. Kompanyayê da zanîn ku tevî destpêkirina kar, hîn jî pêwîstî bi çend mehan ji bo sererastkirina ziyanên li zeviyan heye û fikarên ewlehiyê jî berdewam in.

Hate destnîşankirin ku plana sereke ya DNO ew e, asta berhemanînê vegerîne rewşa beriya êrîşan, ku li her du zeviyan bi hev re rojane 100 hezar bermîl petrol dihat derxistin.

Ev nivîs 138 car hatiye xwendin.