Moskowa: Em aştiyê dixwazin, lê êrîşên li Ûkraynayê dê berdewam bikin

PeyamaKurd – Kremlînê ragihand ku ew daxwaza xwe ya "bidestxistina armancan bi rêbazên siyasî û dîplomatîk" didomîne, tevî ku di êrîşên esmanî yên dawî yên li ser Ûkraynayê de herî kêm 15 kesan jiyana xwe ji dest dan jî.

Serokê Ûkraynayê, Volodîmîr Zelenskî, êrîşa li ser paytext Kîevê ya ku di encamê de 4 zarok jî di nav de bûn, wekî "bersiva Moskowayê ji bo însiyatîfên aştiyê" bi nav kir.

Dema ku ji berdevkê Kremlînê, Dmîtrî Peskov, hat pirsîn ka gelo di navbera êrîşan û danûstandinên aştiyê de nakokî heye, wî got, "Her du alî jî êrîşî hev dikin. Lêbelê, Rûsya hîn jî amade ye ku bi rêya dîplomasiyê bigihîje armancên xwe." Peskov îdia kir ku artêşa Rûsyayê tenê binesaziya leşkerî û ya pê ve girêdayî dike armanc û sivîl bi zanebûn nayên hedefgirtin.

Peskov herweha diyar kir ku Ûkrayna jî êrîşên xwe li ser binesaziyê, heta tesîsên sivîl jî, li Rûsyayê didomîne. Wî got, "Operasyoneke leşkerî ya taybet berdewam dike. Êrîşên rejîma Kîevê li ser binesaziya Rûsyayê, ku pir caran binesaziya sivîl e, jî berdewam dikin. Artêşa Rûsyayê jî erkên xwe pêk tîne. Armanc tên lêdan û hilweşandin. Di heman demê de, Rûsya hîn jî bi pêvajoya danûstandinan re eleqedar e da ku bi rêbazên siyasî û dîplomatîk bigihîje armancên xwe."

Ev nivîs 88 car hatiye xwendin.