Riha | Li Girê Mendikê şopên herî kevn ên serdema Neolîtîk derketin
PeyamaKurd- Li bajarê Riha yê Bakurê Kurdistanê kolanên li derdora Girê Mirazan, di çarçoveya "Projeya Girên Keviran" de berdewam dikin.
Di kolanên projeya pêşengiya wê Wezareta Çand û Tûrîzmê ya Tirkiyê dike de, li Girê Mendikê ku tê bawerkirin ji Girê Miravan û Girê Karahanê kevintir e, şopên serdema Neolîtîkê derdikevin holê.
Girê Mendik ku li taxa Payamliya navçeya Eyûbiyê ye, ji aliyê Rêveberê Kolana Girê Çakmakê Fatma Şahin ve hatiye keşfkirin. Kolanên ku bi serokatiya Prof. Dr. Douglas Baird, mamosteyê beşa Arkeolojiyê ya Zanîngeha Lîverpoolê û hevkariya Muzexaneya Arkeolojiyê ya Rihayê û piştgiriya Enstîtuya Arkeolojiyê ya Brîtanî di sala 2024an de dest pê kiribûn, îsal jî berdewam dikin.
Prof. Dr. Douglas Baird diyar kir ku li herêmê avahiyên bi mezinahiyên cuda derketine holê û ew hewl didin ku fonksiyonên wan fêm bikin.
Baird destnîşan kir ku kolanên li herêmê bi baldarî têne meşandin û wiha got: "Di kolanên ku me sala borî vekirin de, gelek avahî derketin holê. Hinek ji wan mezin in, hinek jî biçûk in. Îsal em ê hewl bidin ku sedemên van cudahiyan fêm bikin. Gelo avahiyên biçûk ji bo karên taybetî, wek depokirin an amadekirina xwarinê hatine bikaranîn? Gelo yên ku çar-pênc metreyî ne dikarin bibin cihên rûniştinê? An jî yên mezintir cihên rûniştinê bûn an avahiyên taybet ên ji bo rîtuelan hatine çêkirin bûn? Bi taybetî, avahiya mezin a li kolaneke din, bi kevirên xwe yên bi rêkûpêk û baş hatine çêkirin, bala mirov dikişîne. Ev yek jî îhtîmala ku avahî ji bo armancên rîtuelî hatibe bikaranîn xurtir dike."
Girê Mendik diçe heta serdema Neolîtîk
Baird bal kişand ser wê yekê ku ew difikirin Girê Mendik heta destpêka Serdema Neolîtîkê vedigere û wiha pê de çû: "Ev der, bi cihên din ên Projeya Girên Keviran ên wekî Göbeklitepe (Girê Miravan) û Karahantepeyê ve girêdayî ye, lê îhtîmal heye ku ji wan hinekî kevintir be. Em difikirin ku ew heta destpêka Serdema Neolîtîkê vedigere. Ev xebat hem ji bo pêşketina Projeya Girên Keviran hem jî ji bo fêmkirina Serdema Neolîtîkê çawa dest pê kiriye û pêş ketiye, ji me re dibin alîkar. Daneyên derbarê pêvajoya derbasbûna mirovan a ji bo jiyana rûniştî de, dê werin nirxandin. Di çarçoveya projeyê de, li Girê Çakmakê ku Fatma Şahin lê dikole û nêzîkî 5 kîlometreyî dûrî vir e jî, dîrokên bi vî rengî derdikevin holê û tê dîtin ku her du cih jî dibe ku ji cihên din ên Girên Keviran hinekî kevintir bin. Li vir ne kevirên mezin ên bi şêweyê "T" yên wekî yên li Girê Miravan û Karahantepeyê, lê kevirên mezin ên ne bi şêweyê "T" hatine dîtin ku taybetmendiyeke cuda ya herêmê nîşan dide."
Ev nivîs 81 car hatiye xwendin.
