Şerê Ûkraynayê ber bi qonaxeke nû ve diçe: Artêşa Rûsî derbasî herêma Dnipropetrovskê bû

PeyamaKurd – Rayedarên Ûkraynayê ragihand ku artêşa Rûsyayê êrîşên xwe berfirehtir kirin û derbasî herêma stratejîk a Dnîpropetrovskê ya li Rojhilatê welêt bûne. Ev pêngav weke destpêka qonaxeke nû û krîtîk a di şer de tê nirxandin, ku li herêmê şerên dijwar rû didin.

Şerên dijwar li herêma pîşesaziyê

Li gorî daxuyaniyên fermî yên Ûkraynayê, li hin gundên herêma Dnîpropetrovskê şerên giran di navbera her du aliyan de berdewam dikin. Vîktor Trehûbovê ji Koma Leşkerên Stratejîk ên Operasyonel ên Dnîproyê, ev tevgera Rûsyayê weke "operasyona herî berfireh a heta niha" li herêmê bi nav kir û diyar kir ku hêzên Rûsî hewl didin ji xwe re baregehekê ava bikin. Trehûbov herweha da zanîn ku li hin cihan bipêşveçûna artêşa Rûsî hatiye rawestandin.

Ji aliyekî din ve, projeya nexşeyan a Ûkraynî "DeepState"ê îdia kir ku gundên Zaporizhya û Novohryhorîvka ji aliyê Rûsyayê ve hatine dagirkirin. Lêbelê, Fermandariya Giştî ya Ûkraynayê ev îdia red kir û ragihand ku Zaporizhya hîn di bin kontrola wan de ye û şer li derdora Novohryhorîvka didome.

Giringiya stratejîk a Dnîpropetrovskê 

Herêma Dnîpropetrovskê ya ku beriya şer nifûsa wê zêdetirî 3 milyon kesî bû, weke duyemîn navenda herî mezin a pîşesaziyê ya Ûkraynayê tê zanîn. Ev herêm bi hilberîna pîşesaziya giran û potansiyela xwe ya aborî, piştî Donetsk û Lûhanskê yek ji stûnên sereke yên aboriya welêt e. Tê payîn ku ketina hêzên Rûsî bo vê herêmê, gefan li ser paytext Kîev û bajarên din ên li Rojavayê Ûkraynayê zêdetir bike.

Çapemeniya Rûsyayê vê pêngavê weke "destpêka qonaxeke nû" piştî destkeftiyên li eniya Donetskê dinirxîne. Tevî ku Wezareta Parastinê ya Rûsyayê îdia dike ku li hin gundan kontrol bi dest xistiye, artêşa Ûkraynayê tekez dike ku berxwedana wan li hemberî êrîşan berdewam dike û bipêşveçûna hêzên Rûsî hatiye hêdîkirin.

Ev nivîs 73 car hatiye xwendin.