Hikûmeta Herêma Kurdistanê ji bo bipêşxistina veberhênanê piştgiriyê dide ramanên ciwanan
PeyamaKurd – Li Hewlêrê, bi însiyatîfa Hikûmeta Herêma Kurdistanê, ciwanên xwedî ramanên nûjen û veberhêner hatin cem hev da ku derfetên veguherandina van ramanan bo projeyên berbiçav gotûbêj bikin û bi vî awayî beşdarî pêşeroja nûjeniya aborî li herêmê bibin.
Ev pêngav bi rêya "Rêxistina Nûjenkerên Kurdistanê" tê birêvebirin, ku di bin çavdêriya hikûmetê de û bi piştgiriya qanûnî kar dike ji bo komkirina ciwanên jêhatî û xwedî fikirên afirîner.
Cîgirê Serokê Yekitiya Veberhêneran, Kemal Gerdî, ji BasNewsê re ragihand ku armanca vê civînê ew e ku pirek di navbera ciwanên xwedî raman û sermayedaran de were avakirin. Wî got:
"Ciwan û xwediyên ramanan bi veberhêneran re rûniştin da ku ramanên xwe bixin nav projeyên veberhênanê."
Gerdî herweha da zanîn ku ev rêxistin di bin çavdêriya rasterast a Serokê Hikûmeta Herêma Kurdistanê, Mesrûr Barzanî de ye û armanca wê ew e ku sûd ji ramanên herî nûjen ên welatiyan, bi taybetî yên ciwanan, were wergirtin. Wî tekez kir ku Herêma Kurdistanê di sektora veberhênanê de di lûtkeyê de ye û ji bo bipêşxistina projeyên bi kalîte, pêwîstiya wê bi fikirên nû heye.
Li gorî Gerdî, Herêma Kurdistanê di qonaxeke gelekî bipêşketî ya veberhênanê de ye û niha giranî li ser kalîteyê ye, ne li ser hejmarê. Ji ber vê yekê, ji bo bicihanîna projeyên serkeftî û nûjen, pêdivî bi ramanên cihêreng û afirîner heye.
Ev nivîs 103 car hatiye xwendin.
