Komeke girtiyan hewl da ji Girtîgeha Kallasê ya Hesekê firar bike
PeyamaKurd – Hêzên Ewlekariya Hundirîn (Asayîş) li bajarê Hesekê yê Rojavayê Kurdistanê, îro Înê serê sibê hewldaneke firarkirineke komî ya ji Girtîgeha "Kallasa" pûç kirin. Bûyer piştî ku hin girtiyan serhildanek kurt derxistin, qewimî lê di demeke kin de hat kontrolkirin.
Li gorî daxuyaniya Desteya Karûbarên Hundirîn a Rêveberiya Xweser, bûyer di dema jimartina rojane ya girtiyan de dest pê kir. Hin girtiyan ji bo derxistina tevliheviyê serî hildan û rewş ji bo nêzîkî saetekê aloz bû. Hêzên Asayîşê demildest midaxeleyî bûyerê kir, aramî vegerandin û pêşî li hewldana revînê girtin.
Rewangeha Sûrî ya ji bo Mafên Mirovan (SOHR) jî ragihand ku girtiyan bi armanca afirandina kaosê û vekirina rêya revê tevdigeriyan. Lê belê, pasewanên girtîgehê û hêzên piştgiriyê yên Asayîşê di demeke kurt de kontrola rewşê bi dest xistin û girtî ewle kirin. Hat zanîn ku hin girtiyên destpêkerên serhildanê hatine naskirin û ji bo lêpirsînê ew birine hucreyên yekkesî.
Desteya Karûbarên Hundirîn da zanîn ku tu êrîşeke ji derve yan jî desttêwerdanê çekdarî çênebûye û tekez kir ku ev bûyer tenê serhildaneke navxweyî bû û tu bandoreke neyînî li ser ewlehiya giştî ya bajêr nekiriye.
Girtîgeha Kallasa bi giranî ji bo girtiyên ku bi tawanên sivîl û sûcên giştî têne darizandin, tê bikaranîn. Çavkaniyên mafên mirovan berê jî bal kişandibûn ser qerebalixî û kêmasiyên di xizmetguzariyên girtîgehê de, ku carinan dibin sedema alozî û nerazîbûnan.
Ev girtîgeh yek ji gelek navendên binçavkirinê yên di bin kontrola Rêveberiya Xweser de ye. Ewlehiya herêmê bi hevahengiya di navbera Hêzên Ewlekariya Hundirîn (Asayîş) û Hêzên Sûriya Demokratîk (HSD) de tê misogerkirin, ku bi hev re roleke sereke di têkoşîna li dijî gefên komên tundrew de dilîzin.
Ev nivîs 122 car hatiye xwendin.
