Medyaya YNKê: Lahur Şêx Cengî û birayê wî Polad hatin desteserkirin
PeyamaKurd – Serokê Fraksiyona Eniya Gel Lahur Şêx Cengî û birayê wî Polad ji aliyê hêzên ewlehiyê yên Silêmaniyê ve hatin desteserkirin.
Desteserkirina Lahur Şêx Cengî û birayê wî Polad piştî raporek berê ya medyaya Yekîtiya Niştimanî ya Kurdistanê (YNK) hat ku komek şervanên girêdayî Lahur Şêx Cengî li Otêla Lalezar teslîmî hêzên YNKê bûne.
Medyaya YNKê herwiha desteserkirina Rebwar Hemîd Hecî Xalî, fermandarê hêzên Lahur Şêx Cengî, ragihand.
Hat ragihandin ku hevjîn û zarokên Lahur Şêx Cengî ewle ne û ji bo cihekî ewle hatine veguhastin.
Dadgeha Silêmaniyê fermana girtinê ji bo Lahur Şêx Cengî derxistiye.
Şer û pevçûn saet di 3:00ê sibê de li Otêla Lalezar dest pê kirin û çar saetan berdewam kirin.
Li gorî medyaya YNKê, du hêzên YNKê hatin kuştin û 15 kes birîndar bûn.
