Daxuyaniya Amerîkayê li ser êrîşê: Moşeka Hûsiyan li Yemenê bû sedema teqînê
PeyamaKurd – Di teqînekê de li paytexta Yemenê Sana, nêzîkî cihekî mîrateya cîhanî ya UNESCOyê, 12 kes hatin kuştin. Karbidestên tenduristiyê yên girêdayî rêveberiya Hûsiyan îdîa kirin ku bûyer encama êrîşeke asmanî ya Amerîkî ye. Lê belê, Fermandariya Navendî ya Amerîkayê (CENTCOM) ragihand ku teqîn ji ber moşekeke parastina asmanî ya Hûsiyan çêbûye.
Berdevkê CENTCOMê Dave Eastburn qebûl kir ku Amerîkayê wê şevê li ser Sanaayê operasyonên leşkerî pêk anîne, lê diyar kir ku êrîşa herî nêzîk a Amerîkayê sê kîlometre dûrî cihê bûyerê pêk hatiye.
Karbidestên Pentagonê, li gorî Reutersê, bi îşaret bi raporên herêmî û nivîsên bi Erebî yên li ser parçeyên moşekan, gotin ku ew bawer dikin teqîn ji ber moşekeke Hûsiyan çêbûye. Pentagonê tu delîlên ku piştgirîya îdiayên xwe bikin eşkere nekiriye.
Ji aliyê din ve, Hûsiyan daxuyaniya Amerîkayê wekî hewldanek ji bo reşkirina tevgera wan bi nav kirin. Rayedarê Hûsiyan Mihemed el-Buhaîtî îdia kir ku Amerîkayê berê jî bender, goristan û malên sivîlan hedef girtibûn û ev yek bûbû sedema mirina bi sedan kesan.
Di hefteyên dawî de, Dewletên Yekbûyî yên Amerîkayê li Yemenê li dijî deverên di bin kontrola Hûsiyan de êrîşên hewayî yên dijwar pêk anîn. Ji aliyê din ve, Hûsî ji bo hevgirtina Filistîniyên li Xezzeyê bi roket û dronan êrîşî Îsraîlê dikin û li Deryaya Sor êrîşî keştîyan dikin.
Rojnamevanan nekarîn cihê rastîn ê teqînê piştrast bikin ji ber ku rayedarên Hûsî rê li ber belgekirina êrîşên asmanî girtin. El-Buhaîtî îdia kir ku herêm ji bo hewildanên rizgarkirinê û ji bo pêşîgirtina li êrîşeke duyemîn hatiye girtin.
