Îsraîlê ji bo vekişîna ji Lubnanê merc danî: Divê Hizbullahê were bêçekkirin

PeyamaKurd – Serokwezîrê Îsraîlê Benjamîn Netanyahû ragihand ku welatê wî amade ye hêzên xwe ji başûrê Lubnanê vekişîne, lê bi mercê ku hikûmeta Bêrûdê gavên pratîkî ji bo bêçekkirina Hizbullahê bavêje. Ev daxuyanî piştî biryara hikûmeta Lubnanê ya ji bo xebata li ser bêçekkirina komên çekdar hat.

Roja Duşemê, ofîsa Serokwezîr Netanyahû daxuyaniyek belav kir û tê de pêşwaziya "biryara giring" a kabîneya Lubnanê kir, ku armanc dike heta dawiya sala 2025an çekan tenê di destê dewletê de bihêle. Di daxuyaniyê de hat gotin ku ev pêngav "derfeteke giring e ji bo Lubnanê ku serweriya xwe ji nû ve bi dest bixe û otorîteya saziyên dewletê vegerîne.

Tel Avîvê da zanîn ku eger artêşa Lubnanê dest bi pêkanîna plana bêçekkirinê bike, Îsraîl dê "tedbîrên hevbeş" binirxîne. Ev tedbîr, kêmkirina hebûna leşkerî ya Îsraîlê li başûrê Lubnanê bi awayekî qonax bi qonax û di bin hevahengiya mekanîzmayeke ewlehiyê ya bi pêşengiya Amerîkayê de, dihewîne.

Ev geşedan piştî zextên mezin ên Amerîkayê li ser Bêrûdê pêk hat. Nûnerê taybet ê Amerîkayê Tom Barrack, ku ji bo xurtkirina agirbesta ku di Mijdara 2024an de hatibû ragihandin dixebite, hefteya borî li herêmê bû. Barrack li Bêrûdê gotibû, "Ez bawer im ku hikûmeta Lubnanê para xwe pêk aniye. Niha tiştê ku em hewce ne ew e ku Îsraîl jî li gorî wê tevbigere."

Berteka Hizbullahê 

Lêbelê, Hizbullah bi tundî li dijî plana bêçekbûnê derdikeve. Di daxuyaniyekê de, Hizbullahê biryara hikûmetê wekî "gunehekî giran" bi nav kir û ragihand ku ew ê vê biryarê "wekî ku tune be" bihesibînin. Hizbullah israr dike ku heta Îsraîl bi tevahî ji herêmên dagirkirî yên Lubnanê venekişe û êrîşên xwe yên hewayî nesekinîne, ew ê dev ji çekên xwe bernedin.

Ji aliyê din ve, rayedarên Hizbullahê diyar dikin ku çekên wan ji bo parastina Lubnanê li hember Îsraîlê ne û ew amade ne ji bo diyalogê li ser stratejiyeke berfireh a ewlehiya neteweyî.

Hikûmeta Lubnanê heta niha bersiveke fermî nedaye daxuyaniya Netanyahu. Pêkanîna plana bêçekkirinê ji ber dijberiya xurt a Hizbullahê û perçebûna siyasî ya kûr a li welêt, bi nezelaliyek mezin re rû bi rû ye.

Ev nivîs 77 car hatiye xwendin.