Netanyahu: Avakirina dewleta Filistînê fikreke bêwate ye
PeyamaKurd – Serokwezîrê Îsraîlê Benjamin Netanyahu avakirina dewleteke Filistînî wekî fikreke "bêwate" bi nav kir, û biryarên navneteweyî yên li ser vê mijarê paşguh kir.
Li gorî rojnameya Israel Hayom, Netanyahu bi hejmarek balyozên ku li Neteweyên Yekbûyî (NY) li Orşelîmê kar dikin re civiya.
Netanyahu di civîna xwe ya bi balyozan re got, "Ew fikra ku aştî wê bi avakirina dewleteke Filistînî re were, fikrek bêwate ye. Me ew li Xezzeyê ceriband. Em ê rejîmek ku hewl dide me tune bike, bi rejîmek din a ku ji bo heman armancê dixebite neguherînin."
Serokwezîrê Îsraîlê îdia kir ku "astengiya sereke ya li pêşiya aştiya di navbera Îsraîl û Filistîniyan de ew e ku beşek ji cîhana Ereb hîn jî dewleta Cihûyan nas nake."
Netanyahu diyar kir ku ew di navbera Hamas û Desthilata Filistînê de ti ferqekê nabîne û got, "Hamas hewl dide ku Îsraîlê tavilê ji hêla leşkerî ve tune bike. Ji aliyê din ve, Desthilata Filistînê armanc dike ku Îsraîlê bi rêyên navneteweyî vekişîne sînorên 1967an û dûv re êrîşeke leşkerî bide destpêkirin."
Bi vê daxuyaniyê, Netanyahu biryarên NY û qanûna navneteweyî paşguh kir ku banga "avakirina dewletek Filistînî di nav sînorên 1967an de bi paytexta Rojhilatê Qudsê" dikin.
Ev nivîs 31 car hatiye xwendin.
