Pêncwênî: Tirkiye di çareserkirina mesela Kurd de hêdî ye, dibe ku pêvajo têk biçe

PeyamaKurd – Siyasetmedarê Kurd Mihemed Emîn Pênciwênî hişyarî da ku ger Tirkiye di çareserkirina mesela Kurd de lez neke, pêvajoya aştiyê dibe ku têk biçe. Pênciwênî destnîşan kir ku Partiya Karkerên Kurdistanê (PKK) bi şewitandina sembolîk a çekan bersiveke erênî daye banga Abdullah Ocalan, lê niha dor dor Tirkiyeyê de ye.

Pênciwênî ji Rûdaw TVyê re diyar kir ku komîsyona parlemena Tirkiyeyê dê heta dawiya Cotmehê karê xwe biqedîne, lê leza hêdî ya pêvajoyê metirsiyek cidî ye. Wî herweha bal kişand ser projeyên Rojhilata Navîn û got ku Kurd di çarçoveya berjewendiyên Amerîkî û Îsraîlî de di xaleke giring de ne, ku ev yek bi hilweşîna dewletên herêmê û avakirina Kurdistana mezin ve girêdayî ye.

Pênciwênî tekez kir ku Tirkiye divê tavilê tevbigere. Wî anî ziman, "Heke Tirkiye pêvajoya aştiyê bi pêş nexe, dê rastî erdhejeke siyasî ya mezin were û heke Kurd nebin şirîkên rastîn ên dewletê, Tirkiye dê perçe bibe." Wî her weha bang kir ku vegera endamên PKKyê, bêçekkirina wan û entegrekirina wan a di jiyana siyasî de li gorî qanûnan û bi hevahengiya bi Hikûmeta Herêma Kurdistanê re were çareserkirin.

Pênciwênî dawî li axaftina xwe anî û got ku aştî bi biryardariya siyasetmedarên Tirkiyeyê ve girêdayî ye, wekî din bêdengiya PKKyê dikare zirarê bide pêvajoyê.

Ev nivîs 107 car hatiye xwendin.